MÛŞ - Dadgehê 8 sal û 3 meh ceza li rojnamevan Îdrîs Sayilgan birî. Parêzeran destnîşan kir ku ji ber fealiyetên rojnamevaniyê ceza hatiye birîn û ev li dijî hiqûqê ye. Berdevkê ÎRA'yê Hakki Boltan jî got: "Ji bo raya giştî nûçeyan bêpar bimîne ev biryar hatiye dayîn."
Nûçegihanê DÎHA'yê ya bi KHK'ê hat girtin Îdrîs Sayilgan ku 2 sal û 3 meh in girtiye, duh di danişîna li Dadgeha Cezayê Giran a 2'yan a Mûşê dadgehê bi îdiaya "endamtiya rêxistinê" û "propgandaya rêxistinê" 8 sal û 3 meh ceza lê birî. Parêzer Bariş Oflas, parêzera Komeleya Xebatên Çapemenî û Hiqûqê (MLSA) Zelal Pelîn Dogan û Berdevkê Înîsyatîfa Rojnamevanên Azad (ÎRA) Hakki Boltan cezayê hatiye birîn nirxandin.
‘WÊ BÊ BERDAN'
Oflas, destnîşan kir ku cezayê hatiye birîn pir zêde ye û got: "Em ê serî li Dadgeha Îstinafê bidin. Em ê li benda encama serlêdana me ya DMME'yê bin." Oflas, bi bîr xist DMME'yê serlêdana wan xistiye rêza pêşîn û ew û MLSA bi hev re dozê dişopînin û ew bawer dikin ku wê DMME der barê binpêkirina azadiya çapemeniyê de biryarekê bide. Oflas, bilêv kir ku piraniya cezayên Dadgeha Cezayê Giran a 2'yan a Mûşê ji aliyê dadgehên îstinafê ve tên xerakirin. Oflas, bilêv kir ku li gorî Peymana Mafên Mirovan a Ewropayê maddeya 10'an û maddeya 26 û 28 a Qanûna Bingehîn hatiye binpêkirin û ew ê îtiraz bikin. Oflas got: "Em wisa hêvî dikin ku wê piştî van îtirazan Îdrîs Sayilgan bê berdan."
‘EM LI BENDA BIRYARA DMME'YÊ NE'
Parêzer Zelal Pelîn Dogan ku ji destpêkê ve dozê dişopîne, destnîşan kir ku li dijî vê bêhiqûqiyê wan gelek caran serî li dadgehên hermî û Dadgeha Qanûna Bingehîn daye lê belê dîsa jî ev yek nehatiye serrastkirin. Dogan, destnîşan kir ku piştî vê wan serî li DMME'yê daye û DMME'yê jî dosyeya saylgan xistiye nav ên di rêza pêşîn de. Dogan, destnîşan kir ku wê ji ber vê biryara dadegê DMME Tirkiyeyê mehkûm bike û got: "Sayilgan tenê ji ber xebatên xwe yên rojnamevaniyê tê darizandin. Nûçeyên çêkirine, hevdîtinên wî yên bi çavkaniyên nûçeyan re di îdianameyê de ne. Ev li dijî hiqûqê ne. Em ê îtiraz bikin. Lê em li benda biryara DMME'yê ne. Xebatên rojnamevan Sayilgan ne sûc in. Em MLSA em ê heta dawiyê vê dozê bişopînin."
'NAHÊLIN RAYA GIŞTÎ NÛÇEYAN BIGIRE'
Berdevkê ÎRA'yê Hakki Boltan jî destnîşan kir ku di şexsê rojnamevan Îdrîs Sayilgan de ceza li rojnamevanan tê birîn û rojnamevanên berê hatibûn girtin û ceza li wan hat birîn bi bîr xist. Bolatn got: "Bi vî cezayî jî aşkere ye ku nahêlin raya giştî hay ji nûçeyan hebin û bigirin. Em vê yekê bi tu awayî qebûl nakin. Ji bo raya giştî bêyî nûçe nemîne em ê tim nûçeyan çêbikin."
MA / Cemil Ugur