COLEMÊRG - Namzetên Şaredariya Geverê Remziye Yaşar û Îrfan Sari, bilêv kir ku ew ê tevî gel navçeyê bi rê ve bibin û hewl bidin ku rêveberiyeke herêmî ya gel daxilî hemû biryaran bibe ava bikin.
HDP'ê namzetên xwe yên şaredariyan ên gelek bajar û navçeyan diyar kir. Namzetên Gevera Colemêrgê yên HDP'ê Remziye Yaşar û Îrfan Sari ne. Sari, bilêv kir ku wî 20 salan serokatiya Odeya Esnaf û Sinhetakaran a Geverê kiriye û ew ê tecrûbeyên xwe yên li vir ji bo rêveberiya herêmî bi kar bîne. Sari, destnîşan kir ku hilbijartina 31'ê Adarê wê li hemberî qeyûman besriv be û wê armanca wan a sereke ew be ku gel daxilî şaredariyê bikin.
Sari, destnîşan kir ku piştî qeyûm hat tayînkirin gel nikare biçe şaredariyê. Sari, diyar kir ku îhaleyên ji aliyê şaredariyê ve hatine kirin û berpêşî şîrketan hatine kirin nehatine aşkerekirin. Sari, bilêv kir ku avahiya şaredariyê veguheriye qereqolê û kes nikare têkevê.
Sari got: "85 sal in Gever navçe ye û 65 salan ji aliyê partiyên pergalê ve hatiye birêvebirin. Ev partî ji bo navçeyê nebûn bersiv. Projeyên di dema partiya me de hatin berpêşkirin jî bi salan nehatin pesendkirin an jî hatin redkirin. Niha li ser rant û qezencê diçe, loma em nizanin şaredariyeke çawa li benda me ye. Divê pêşî em zanibin ka şaredarî tam di çi halî de ye. Divê xesara wê bê tespîtkirin. Di nav projeyên me yên sereke de avaniya bajêr û şaredariyeke civakiyî heye."
'EM BÊ BERSIVA ÊRÎŞAN BIDIN'
Remziye Yaşar jî, diyar kir ku piştî qeyûm hatiye tayînkirin tiştên der barê jinana de hemû tune kirine û got: "Mala Jinê ya Binevşê jî di nav de gelek projeyên şaredariya DBP'î ji holê hatin rakirin. Hevalên me yên jin ên hevşaredar ji peywirê hatin girtin û hatin girtin. Em saziyên jinan ên hatin girtin ji nû ve vebikin û em ê wan xurtir bikin. Ewilî em ê bersiva êrîşên li hemberî bajêr bidin û wê jin pêşengiya şaredariyê bikin."
Yaşar, destnîşan kir ku wê gel şaredariyê bi rê ve bibe û got: "Wê gel tenê deng bi kar neyne. Wê di hemû biryarên tên girtin de cih bigire. Em ê xebatên xwe hemûyan tevî gel bi rê ve bibin."
Yaşar, bi bîr xist qeyûm êrîşî zimanê kurdî jî kiriye û ew ê bi projeyên nû bersiva vê yekê jî bidin. Yaşar, anî ziman ku gel tim xwedî li şaredaryên xwe derdikeve û got: "Em ê bi ruhê seferberiyê tax bi tax, gund bi gun bigerin û bixebitin. Rengê dengê gel diyar e û em ê şaredariyên xwe yên hatine xespkirin bistînin."