AMED – Hevserokê Giştî yê DBP’ê bal kişand ser greva birçîbûnê ya Leyla Guven û got: “Dema agahiyek nexweş ji girtîgehan were wê zirarê bide qada jiyana me ya hevpar. Divê kes li benda agahiyek neyînî ya girtîgehan nesekine.”
Partiya Herêmên Demokratîk (DBP) ji bo balê bikişîne ser tecrîdkirina Rêberê PKK’ê Abdullah Ocalan û grevên birçîbûnê li avahiya xwe ya Navenda Giştî civîna çapemeniyê li dar xist. Serokê Giştî yê DBP’ê Mehmet Arslan, alîkarên Hevserokê Giştî yê DBP’ê Halîde Turkoglu û Mehmet Şîrîn Tunç beşdarî civînê bûn.
‘DAXWAZAN JI NEDÎTÎ VE TÊN’
Hevserok Mehmet Arslan di civînê de axivî û da zanîn ku Hevseroka wan a Giştî Sebahat Tuncel û siyasetmedar Selma Irmak jî di 15’ê çile de dest bi greva birçîbûnê kirin e. Arslan bal kişand ser tecrîdkirina Ocalan û got: “Daxwazên ji bo pirsgirêkên li Tirkiyeyê bi şiklek demokratîk bên çareserkirin ji nedîtî ve tên. Di şexsê Birêz Ocalan de dixwazin tecrîdê li ser gelê kurd li pêş bixin. Yên ku niha tecrîdê giran dikin di 2013’an de Birêz Ocalan wek rêberê kurdan kir muhatabê xwe.”
‘JI BO ÇARESERIYA KRÎZAN DIVÊ HEVDÎTIN BÊ DESTPÊKIRIN’
Arslan pêvajoya hevdîtinên diyalogê ya di navbera 2013 û 2015’an a li gel Ocalan bi bîr xist û got: “Ji bo krîzên bingehîn bên çareserkirin divê li gel Birêz Ocalan demildest hevdîtin dest pê bikin. Daxwaza sereke ya grevên birçîbûnê ew e tecrîdkirina Ocalan dawî lê bê anîn. AKP guhê ji vê daxwazê re girtiye. AKP firsendênade siyaseta demokratîk bê kirin.”
‘DIBE KU HER KÊLÎ AGAHIYEK NEXWEŞ WERE’
Arslan da zanîn ku divê li dijî tecrîdê her kes helwesta xwe ya demokratîk nîşan bide û piştevaniya grevên birçîbûnê bike û got: “Dibe ku her kêlî agahiyek nexweş were. Dema agahiyek nexweş ji girtîgehan were wê zirarê bide qada jiyana me ya hevpar. Divê kes li benda agahiyek neyînî ya girtîgehan nesekine.”
Piştî civîna çapemeniyê DBP’î çûn PTT’ê û ji girtiyan re kartan şandin.