Partiya Demokratîk a Gelen (HDP) Namzetên Hevşaredariya Bajarê Mezin a Amedê Hulya Alokmen Uyanik û Parlamenterê HDP’ê Adnan Selçuk Mizrakli da nîşandan. Uyanik û Mizrakli piştî navê wan aşkere bû ji Ajansa Mezopotamyayê (MA) re axivîn. 

 

ADNAN SELÇUK MIZRAKLI KÎ YE? 

 

Adnan Selçuk Mizrakli di sala 1963’an de li navçya Siwêregê ya Rihayê hat dinê. Bi boneya bavê wî karmend bû 16 sal li Eskîşehîrê ma. Dibistana serete, navîn û lîse li Eskîşehîrê xwend û pişt re ji Fakûlteya Tibê ya Zanîngeha Hacettepe ya Enqereyê mezûn bû. Mizrakli 3 salên ewil ê pîşeya xwe li Enqere û Yozgatê derbas kir. Mizrakli di sala 1991’an de li Amedê dest bi bijîşkiyê kir û 27 sal li nexweşxaneyên cuda yên Amedê wek pisporê cerahê wezîfe kir. Mizrakli ji salên 90’î heta niha di nava xebatên civakî û siyasî de cih girt. Herî dawî di Hilbijartina Giştî ya 24’ê Hezîrana 2018’an de li Amedê wek parlamenterê HDP’ê hat bijartin. Mizrakli zewicî û bavê 3 zarokan e. 

 

HULYA ALOKMEN UYANIK KÎ YE?

 

Hulya Alokmen Uyanik di sala 1975’an de li Êlihê hat dinyayê. Dibistana seretayî, navîn û lîseyê li Êlihe xwend û pişt re ji Zanîngeha Dîcleyê ji beşa tenduristiyê mezûn bû. Ji sala 1995’an ve li saziyên cemaweriyê wek hemşîre xebitî. Ji salên 2000’î vir ve di nava Sendîkaya Kedkarên Xizmeta Tenduristî û Civakî (SES) Platforma Jinan a Amedê de têkoşînê birêve bir. Uyanik di sala 2001’an de sirgûnî Kutahyayê hat kirin. Di sala 2006’an de paş de vegeriya Amedê û di navbera salên 2011 û 2014’an de Serokatiya Şaxa SES’ê y Amedê birêve bir. Di navbera salên 2014 û 2017’an de endamtiya Desteya Kontrolê ya Navenda Giştî ya SES’ê birêve bir û di nava xebatên Komîsyona Tenduristiyê ya Kongreya Civaka Demokratîk (KCD) de cih girt. Di sala 2016’an de bi Biryarnameya di Hukmê Qanûnê de (KHK) ji wezîfeya xwe hat îxrackirin. Uyanik zewicî û dayika du zarokan e.

 

KIŞANAK Û ANLI SILAV KIR 

 

Alokmen Uyanik di axaftina xwe Hevşaredarên Amedê Gultan Kişanak û Firat Anli silav kir û got: “Me dixwest em wezîfeyê ji Birêz Kişanak û Anli dewr bigirin. Lê mixabin di 3 salên dawî de tengezariyan me kişand. Bajarên me hilweşandin. Qeyûm tayîn kirin û vîna gelê me xesp kirin. Em bi vê ferasete re rû bi rû ne.” 

 

‘EM Ê ŞAREDARIYÊ RADESTÎ XWEDIYÊ WÊ ESIL BIKIN’ 

 

Uyanik bi bîr xist ku bi salan e HDP bi şîara “Em ê xwe jî û bajarê xwe ji bîrêve bibin” Amedê birêve dibe û got: “Armanca me ew e ku em şaredariya xwe û saziyên me yên hatine girtin carek din radestî gel bikin. Ev xespkirin li ber çavê her kesî ye. Arezûya me ew e em saziyan radestî xwediyên wê yê esil bikin. Niha qeyûm her deverî dagir kiriye. Em ê her deverê ji xizmeta gel re vekin. Hemû mêjî û nirxên kurdan xwestin ji bajêr paqij bikin. Lê bila dizanibin şaredarî ne cihê zordestiyê ye. Şaredarî cihê xizmeta ji bo gel e.”

 

‘EM Ê BI HEV RE BIRÎNÊN XWE DERMAN BIKIN’ 

 

Uyanik Amedê wek “bajarek birîndar” nirxand û got: “Îro birînên me bêtirin. Em ê bi hev re birînên xwe bipêçin. Em ê Amedê veguherînin halê berê. Em bikin ku her kes dikaribe li Amedê xwe bi ramanek azad bîne ziman. Em ê şaredariyake wekheviya zayendî birêve bibin. Em ê vîna jinan derxin holê û Amedê bikin bajarê jinê.” 

 

‘EM ZAROKÊN VÊ AXÊ NE’ 

 

Uyanik da zanîn ku HDP li Amedê hakimî pirsgirêkên civakî, aborî û siyasî ne û got: “Em zarokên vê axê ne. Em li van deran mezin bûn. Em bi bawerin ku em ê van pirsgirêkan bi gelê xwe, jin û jinan re çareser bikin. Em bi bawerin ku dê vîna gel bi ser bikeve.” 

 

MIZRAKLI: EM BI RAKIRINA DÎWAR Û SÎNORAN RE TENÊ NEMÎNIN 

 

Selçuk Mizrakli jî bi bîr xist ku Şaredariya Bajarê Mezin a Amedê hatiye xespkirin û ev xespkirin bi destê rêveberiya navendî pêk hatiye. Mizrakli destnîşan kir ku vîna hatiye xespkirin ew ê dîsa bi vîna gel paş de bi dest bixin û wiha got: “Me berê jî gotibû. Şaredarî tenê ne saziyek e. Saziyek ku civak dikare xwe bi xwe birêve bibe ye. Em ê şaredariyek gel û civakî ji bo gelê Amedê biafirînin. Em ê bi rakirina dîwar û deriyên qeflekirî re bi sînor nemînin. Em ê wir ji sazîbûnê derbixin û bînin halê ku rêveberiya gel. Em ê keda hevalên xwe yên girtî û yan jî hatine sirgûnkirin zêdetir bikin. Em ê xwedî li ked û têkoşîna wan derkevin.” 

 

‘EV MEŞA GELÊ ME YE’ 

 

Mizrakli anî ziman ku ji sala 1999’an vir ve HDP bi feraseta rêveberiyên herêmî tevî hemû derfetên zor xizmetek şaredariya gel afirandiye û ew ê ji niha şûn ve ferasetek şaredariyê ya bi hêz birêve bibin. Mizrakli diyar kir ku ew ê bikin ku li bajêr her kes bibe xwedî pêşniyarek û gotinekê û got: “Ev meş ne meşa me ye. Wê ev meş bibe meşa gel a derdora nirxên pê bawer e.” 

 

‘EM Ê BIKIN BAJARÊ RAMANÊ’ 

 

Mizrakli anî ziman ku gelek karê ew bikin heye û got: “Em ê xwe bi xwe birînên xwe derman bikin. Em ê bajar ji nû ve zindî bikin û em ê bikin bajarê fikr û ramanê. Em modelek ku ji cîhanê re bibe mînak li pêş bixin. Jixwe tecrûbeya me ya 16-17 salan heye. Em ê li ser vê tecrûbeyê tecrûbeyên nûjen zêde bikin. Em ê rihek fedekar û piştevaniyê bikin bajarê rêveberiya civakî. Em bi gelê xwe û siyaseta xwe bawerin. Rêya me hemûyan vekirî be û ronî be.” 

 

MA / Ozgur Paksoy - Mehmet Şah Oruç