Hevseroka Kongreya Civaka Demokratîk (KCD) û Parlamentera HDP'ê ya Colemêrgê Leyla Guven ji bo rakirina tecrîdkirina Rêberê PKK'ê Abdullah Ocalan 62 roj in di çalakiya greva birçîbûnê ya bêdawî û bêdorveger de ye. Heval û xizmên Leyla Guven ên li gundê Yaprakli ya girêdayî navçeya Cîhanbeylî ya Konyayê têkildarî çalakiya Guven axivîn. Xizm û hevalên Leyla Guven li bendê ne daxwaza Guven bê qebûlkirin û li benda xeberên xêrê ne. 

 

'EM PIR JI LEYLA HEZ DIKIN' 

 

Xaltîka Guven, Ayşe Korkmaz destnîşan kir divê daxwaza Leyla Guven demildest bê qebûlkirin û got: "Bila daxwaza wê qebûl bikin û ew jî dawî li çalakiya xwe bîne. Em ji Leyla pir û pir hez dikin û em naxwazin tiştek bê serê wê. Em bi bawerin dê xeberên xweş werin." 

 

‘LEYLA NAVÊ TÊKOŞÎNÊ YE' 

 

Hevala Guven a ji gundê wê Zeynep Canavar jî da bal kişand ser nasnameya Guven a têkoşînê û wiha got: "Em hemû li pey Leyla ne. Ji bo dawî li çalakiya xwe bîne bila daxwaza wê bê cih. Em naxwazin ku berxwedêr jiyana xwe ji dest bidin. Bila berxwedêr bijîn ku mafên Kurdan biparêzin. Leyla ji bo hebûna gelê Kurd xwe veda dike. Leyla pir xweşik li ber xwe dide. Em pir jê hez dikin. Em hêvîdarin wê di demek kurt daxwaza wê bê qebûlkirin û Leyla bigîhîje zarok, jiyana xwe û vegere partiya xwe. Leyla jinek dizane wê çawa li ser piya bisekine û jinek berxwedêr e. Dema mirov dibêje Leyla Guven têkoşîn tê bîra mirov. Heta ji destê me bê em bi wê re li ber xwe bidin. Leylayên ji bo gelê Kurd şer dikin wiha bi hêsanî nayên dinyayê." 

 

‘EM JI REWŞA WÊ BI GUMAN IN' 

 

Keçxaleta Guven, Erdal Gursel jî anî ziman ku çalakiya keçxaleta wê gelek mafdar e û got: "Leyla bi şev û roj di bîra min de ye. Êşa li derdora min bandorek neyînî li ser min dike. Ji ber vê yekê piştevaniya Leyla dikim û em ji rewşa wê bi guman in. Jinek pir xweşik û berxwedêr e." 

 

‘EM LI CEM LEYLA NE' 

 

Hevala Guven, Zekiye Dogan jî diyar kir ku ew bi hev re li çola gund mezin bûne û wiha got: "Leyla jinek pir jîr û bi hişmend e. Em dixwazin daxwaza wê bê qebûlkirin. Li vir her kes  ji Leyla hez dike. Em li benda xebera xêrê ne. Ji bo daxwaza wê bê qebûlkirin em bi hêvî ne. Em li cem Leyla ne." 

 

MA / Dîren Yurtsever