RIHA - Rêyên ku qeyûm li navçeya Wêranşar a Rihayê bi 12 milyon tl çêkir, bi barana ewil a zivistanê re tev hilweşiyan. Welatiyên navçeyê bertek nîşanî vê yekê dan û diyar kirin ku 12 milyon tl li ku xerç kirine ne diyar e. Welatiyan anîn ziman ku piştî qeyûm hat navçeyê 2 salin ruyê xizmetê nedîtine.
Li bajarên herêmê piştî qeyûm tayînî şaredariyên Partiya Herêmên Demokratîk (DBP) kirin, êdî xizmeta ji bo welatiyan jî bi dawî bû. Qeyûm li şûna ku xizmetê bike, avahiyên şaredariyan vegerandin qereqolan. Gelek sazî û dezgehên jin, ciwan, çand, ziman, perwerde, tenduristiyê ku ji bo xizmeta gel hatibûn avakirin yek bi yek girtin. Xizmeta dike jî pişti demekê xera dibe. Li navçeya Wêranşar a Rihayê jî di 10'ê Çileya 2017’an de qeyûm tayînî navçeyê hat kirin. Li şûna Şaredarê DBP'î Emrullah Cîn Qeymeqam Omer Cimşît tayînî şaredariyê kirin. Qeyûm di sala 2017'an de di bin navê xizmeta park, rêyên taxan, çêkirina mizgeft û malên sersaxiyê, û projeyên civakî de 27 milyon û 979 hezar û 852 TL pereyê şaredariyê xerç kir. Li gorî rapora şaredariyê Qeyûm ji bo rêyên taxan 12 milyon û 190 hezar û 255 TL pere xerç kir. Rêyên ku qeyûm çêkirin, piştî barana ewil tev xera bûn û hilweşiyan.
'EM XIZMETÊ NABÎNIN'
Welatî Mustafa Eşim, diyar kir ku piştî qeyûm tayînî navçeya wan hat kirin û şûnde êdî rûyê xizmetê nabînin. Eşîm, da zanîn ku qeyûm 12 milyon tl li rêyên wan xerç kiriye, lê piştî barana ewil hemû rê xera bûne û hilweşiya ne. Eşîm destnîşan kir ku ew nizanin ew pere li ku û li çi hatiye xerçkirin û wiha got: "Piştî qeyûm tayînî şaredariyê kirin 27 milyon tl ji butçeya şaredariyê xerç kirin. Ger ku ew qas pere qerç kirin çima em nabînin. Li xizmetê tu pere nehatiye xerçkirin. Ger ku bi 12 milyon tl rê çêkiribîn çima niha rê xisa xera dibin. Halê rêyan li holê ye. Ji ber rê xerabûn em nikarin derkevin kolanê. Her ku baran dibare her der dibe cebla heriyê."
ŞAREDARÊ ME HEZAR QAT JI QEYÛM BAŞTIR BÛ
Eşim, herî dawî anî zima ku bi tayînkirina qeyûm re vîna navçeya wan hatiye xezpkirin û wiha bi dawî kir: "Hem vîna navçeyê xezp kirine û hem jî baca welatiyan li gorî berjewendiyên xwe xerç dikin. Her çiqas şaredarê me yê berê xerab bû jî hezar qatî ji qeyûm baştir bû. Qet nebûya hemû hesap û kîtap bi gel re parve dikir û zelal bû. Her tişt li holê bû. Tiştekî veşarî tune bû. Deriyê şaredariyê bi tevahî ji gel re vekirî bûn. Em dê di hilbijartina 31'ê Adarê de Qeyûm bişînin."
Welatî Îsmail Toptan jî heman tişt anî ziman û wiha got: "Piştî 2 salan xizmet qut bû. Di serdema DBP'ê de pirsgirêka xizmeta bingehîn tune bû. Pişti qeyûm tayîn kirin navçe talan û wêran kirin.
MA / Erdogan Alayumat