AMED - Rojnameya kurdî e-rojname ku li ser malperê weşan dikir û 6 rûpel pdf li ser malperê çap dikir, di sersala nû ya 2019'an de dest bi gavek nû kir. Rojnameyê di nivîsa xwe ya edîtor de diyar kir ku di sala nû ya 2019'an de dê tenê rûpela manşetê wekî pdf biweşinin û ji pilî wê dê hemû nûçeyên xwe germ germ li ser malperê biweşînin.
Rojnameya e-rojname ku li ser malperê bi kurdî weşan dikir, di sala nû ya 2019'an de derbasî merhaleyek nû bû. e-rojname di nivîsa etîdor de diyar kir ku çapemeniyaazad li dijî zext û zordariyan rêwîtiya xwe ya ragihandina rastiyan didomîne û ji îro û şûnde wekî e-rojname dê hewl bidin di sala nû û serdema nû ya weşanê de bêhtir dosya, nûçeyên taybet, analîz û lêkolînan bi xwendevanên xwe re parve bikin.
Nivîsa e-rojname ya edîtor wiha ye:
Çapemeniya Azad li dijî zext û zordariyan rêwîtiya xwe ya ragihandina rastiyan didomîne. Rojnamegeriya kurdî ku di sala 1898’an de bi rojnameya Kurdistanê dest pê kir, di sala 1992’yan de bi rojnameya Welat dewam kir û ev rêwîtî li dijî hemû zext û zordariyan dewam dike. Piştî girtina rojnameya Welat di sala 1994’an de rojnameya Welatê Me, di sala 1996’an de rojnameya Azadiya Welat weşana xwe dewam kirin. Azadiya Welat di 15’ê tebaxa 2006’an de dest bi weşana rojane kir û di rojnamegeriya kurdî de pêngaveke girîng avêt. Di 10’emîn salvegera rojanebûna rojnameyê de ji aliyê hikûmeta AKP’ê hat girtin. Piştî wê rojnameyên Rojeva Medya û Welat weşana xwe domandin. Piştî ku ev rojname hatin girtin û ji ber zextên hikûmeta tirk matbaayan rojnameya Welat çap nekirin me bi e-rojnameyê ango bi rojnameya dîjîtal weşana xwe dewam kir. E-rojname 221 hejmar in her roj, bi rûpelên; jin, nûçe-polîtîka, cîhan, dimilkî, çand û hunerê yanê bi giştî 6 rûpelan me xwe gihand hemû hezkiriyên zimanê kurdî.
Di vê rêwîtiya heqîqetê de mebesta me ew e ku em bi zimanê dayikê rastiyan ji gelê xwe re ragihînin. Du armancên me bingehîn hene, ya yekemîn em li dijî polîtîkayên pişaftinê zimanê xwe biparêzin û armanca duyemîn jî rastiyan belav bikin. Em dixwazin xwendevanên xwe têkildarî mijarekê de agahdar bikin; wekî e-rojname em ê edî wekî pdf tenê rûpela yekemîn amade bikin. Rûpelên din dê wekî pdf neyên amadekirin û em ê bêhtir li ser weşana înternetê rawestin. Wekî e-rojname em ê hewl bidin di sala nû û serdema nû ya weşanê de bêhtir dosya, nûçeyên taybet, analîz û lêkolînan bi xwendevanên xwe re parve bikin. Em hevîdar in ku di qada înternet û medyaya civakî de kurdî bêhtir geş bibe û bêhtir bê xwendin.
Her xwendin û tikandina nivîseke kurdî dê ji neyarên zimanê kurdî re bibe bersiva herî xweş. Em li her derê kurdî biaxivin, kurdî binivîsin û bi kurdî bixwînin. Sersala we hemûyan pîroz be!