AMED - Sekreterê Şaxa DTO Orhan Îlîm diyar kir ku pirsgirêkên cidî yên tenduristiyê yên girtîyên di grevên birçîbûnê de rû didin û got: “Li hin girtîgehan rewşa girtiyan nebaşe û êdî hatine asta mirinê. Ji bo muayene kirin girtiyên di greva birçîbûnê de, me bi Dozgerê Înfaza Ceza yê Amedê re hevdîtin kir.”
Şaxa Sendîkaya Kedkarên Xizmeta Civakî û Tenduristiyê (SES) û Odeya Bijîşkên Amedê (DTO), derbarê çalakiyên grevên birçîbûnê yên li girtîgehan berdewam dikin de li Odeya Bijîşkan civîna çapemeniyê li dar xistin. Endamê Konseya TTB’ê Halîs Yerlîkaya, rêveberên DTO û SES’ê beşdarî daxuyaniyê bûn.
‘EM MEHKÛMÊ ŞOPANDINÊ NÎNIN’
Endamê Konseya Navenda TTB’ê Halîl Yerlîkaya, daxuyanî da û wiha axivî: “Em ne mehkûmê şopandina mirina girtiyane. Em bang li hemû beşên civakê û rayedarê berpirs dikin ku vê pirsgirêkê çareser bikin.”
Sekreterê DTO Orhan Îlîm jî, bal kişand ser Girtîgaha Amedê ya sala 1980’iyan û wiha got: “Di çalakiyên grevên birçîbûnê yên salên 1996 û 2000’an de mirin çêbûn. Di vî warî de girtîgehên Tirkiyeyê xwedî dîrokek herî tariye. Çalakiya Hevseroka KDC’ê û Parlementera HDP’ê ya Colemêrgê Leyla Guven li Girtîgeha Amedê di roja 51’emîn de berdewam dike. Çalakiya greva birçîbûnê ya Kadîr Karabak û Esat Nacî Yildirim ên li Girtîgeha Tîpa F a Wanê di roja 100’emîn berdewam dike. Çalakiyên ku li tevahiya girtîgehên Tirkiyeyê hatine destpêkirin, li hin cihan gihaye asta mirinê.”
BI DOZGER RE HEVDÎTIN KIRIN
Îlîm, di dewama axaftina xwe de wiha bilêv kir: “Ji bo ku em rewşa girtiyên di greva birçîbûnê dene, li cihên wan bişopînin û mûayeneyên pêwîst bikin, me hevdîtin bi Dozgerê Înfazê Ceza yê Girtîgehê re hevdîtin kir. Lê hîna bersiv erênê ji bo daxwazên me nehatine dayîn.”
‘PIRSGIRÊKÊN TENDURISTIYA GIRTIYAN CÎDIYE’
Îlîm, da zanîn ku pirsgirêkên tenduristiya girtiyên di greva birçîbûnê dene pir cîdiye û wiha bilêv kir: “Girtiyên di greva birçîbûnê de, êdî nikarin bimeşin, gelek kîlo dane, baş nabînin, tansiyona wan dikeve, serê wan, masûlke û movikên wan diêşin. Dilê girtiyan dixele, divereşin, nikarin razin, ji dengê zêde aciz dibin, nikarin zêde biaxivin, rabin û rûnin û baş bimeşin. Bi taybetî di demên dawî de, dema ava û xewê dixwin divereşin û êdî nikarin avêjê vexwin. Divê Wezareta Dadê destûrê bide parazvanên mafên mirovan ku li girtîgehan hevdîtinê bi girtiyên di greva birçîbûnê dene re bikin. Divê girtî bên muayene kirin.”
Îlîm, dest nîşan kir ku divê rêz ji bo rûmeta girtiyan bê dayîn û wiha dawî li axaftina xwe anî: “Divê girtî tu caran di şertên tecrîd û îzolekirinê de neyên girtin. Ji bo mîna salên bûrî mirin rû nedin, em carek din banga hestiyariyê li raya giştî dikin.”
Sekreterê Şaxa SES’ê ya Amedê Mehmet Nûrî Ulus jî bi Kurdî axivî û banga tevlîbûna bîranîna salvegera Komkujiya Roboskî li hemû kesan kir.