Di 28’ê Kanûna 2011’an de li gundê Roboskî ya Qilebana Şirnexê 19 jê zarok 34 welatî di encama bombebarana balafirên şer ên Artêşa Tirk de jiyana xwe ji dest dan. Di salvegera 7’emîn a Komkujiya Roboskî de li gelek navendan partiyên siyasî, rêxistinên civakî yên sivîl û platforman civîn û daxuyaniyên çapemeniyê li dar dixstin. Di daxuyaniyan de hat xwestin bila dosyeya hatiye girtin bê vekirin û bila kujer û berpirs derbixin holê û hesab ji wan bê xwestin. 

 

Rêxistinên bajar û navçeyan li Amed, Riha, Mêrdîn, Şirnex, Batman, Sêrt, Dersim, Meletî, Çewlik, Mûş, Bedlîs, Wan, Agirî, Colemêrg, Stenbol, Îzmîr, Edene, Mêrsîn, Hatay û gelek navendên din daxuyanî û civînên çapemeniyê li dar xistin. Navenda Giştî ya HDP’ê daxuyaniyek hevpar ji rêxistinên xwe bajaran re şand. Li hemû bajaran heman daxuyanî hat xwendin. 

 

Ligel rêxistinên HDP’ê rêxistinên civakî yên sivîl, mafên mirovan û platformên parastina mafan jî qurbaniyên Roboskî bibîr anîn û di salvegerê de komkujî şermezar kirin. 

 

Daxuyaniya hevpar li bajaran hat dayîn wiha ye: 

 

"Li gundê Roboskî yê ser bi navçeya Qileban a Şirnexê 28’ê Kanûna 2011’î balafirên artêşa Tirk ên şer bombebaran kirin. Di encama vê bombebaranê de 19 jê zarok 34 welatiyên me yên ji gundê Roboskiyê hatin qetilkirin. Komkujiya Roboskiyê ji komkujiya ku dewleta Tirk di dîroka komarê de li hemberî gelê Kurd pêk anî tenê yek jê ye. 

 

Komkujiya Roboskiyê ku bi bombeyên kazanan 34 însanên me hatî qetilkirin, heke li welatekî dîtir pêk hatibûya, divê hikumet biketa. Lê belê li Tirkiyeyê tenê kesekî jî îstîfa nekir. Berovajiyê wê, kesên ku berpirsyarên vê komkujiyê ne hatin xelatkirin û hê jî tên xelatkirin. Li dijî malbatên qurbaniyên komkujiyê jî her cure bê hiqûqî û edaletî rewa tê dîtin. Berpirsyarên komkujiyê yên leşkerî û siyasî dernexistin pêşiya edaletê, lê belê wekîlê me yê Şirnexê ku di vê komkujiyê de gelek xizmên wî hatî qetilkirin, tevî destnedana wî ya wekîliyê heyî jî 4’ê Mijdarê hate girtin. 

 

'NE ROBOSKÎ Û NE YÊN DIN ME JÎ BÎR NEKIR Û EM JI BÎR NAKIN' 

 

Desthilatdariya AKP’ê ku ser komkujiya Roboskî dinixumîne, kujeran xelat dike, di encama polîtîkaya xwe ya qeyyûman ku destdirêjiya li hemberî vîna gelê Kurd e, li dijî bîrdariya ji bo bîranîna Roboskiyê li Amedê hatî çêkirin jî çavtengî kir û ev bîrdariya ku 34 canên me temsîl dike, ji hêla qeyyûmê talankar ên desthilatdariya AKP-MHP’ê ve hate hilweşandin. Desthilatdariya AKP’ê ya însanên me qetil dike, ji xwedî derketina me ya li bîranîna wan jî ditirse. Çi bikin bila bikin, em ê ne komkujiya Roboskiyê ne jî yên din jibîr nekin, nedin jibîrkirin.

 

Tunehesibandin û ser nixumandina sûcên li dijî mirovahiyê, yan jî veşartina wan ne pêkan e. Çiqas dem di ser komkujiya Roboskî de bibore jî bila bibore, heta ku kujerên komkujiyê neyên darizandin û dernekevin pêşberî dadgeriyê dê aramiyeke mayînde, çêker û civakî pêk neyê. 

 

Mêzîna edaleta li Tirkiyeyê ku hevsengiya xwe ya wekhevî û dadweriyê winda kirî, wê bi têkoşîna gelê Kurd û dostên wan ên edaletxwaz bi ser keve ne bi darazgeriya AKP’ê.

 

Di dîrokê de ji hêla kî ve hatibe kirin bila hatibe kirin, tu komkujî û sûcê li dijî mirovahiyê nekariye ji darazgerî û dadweriyê bireve. Çiqas derfet û hêza desthilatdariyê di destê van kesên ku ev sûcên mirovahiyê kirine hebe bila hebe, zû-dereng li pêşberî dadwerî û gel hesab dane û wê bidin. Wê ev bêwijdanî û bê dadweriya wan herî dawî li wan vegere. 

 

Em bi vê baweriyê, di salvegera 7'emîn a komkujiya Roboskî de careke din komkujî û kiryarên wê lanet dikin. Em ê teqez ji kujeran hesab bipirsin. Heta ku edalet pêk neyê wê xwîna me ya li Roboskî rijiyayî tevlî axê nebe."