ENQERE - Endamê Komîsyona Girtîgehan a Baroya Enqereyê Prz. Fatih Gokçe, têkildarî zarokên li Girtigeha Zarokan a Sîncanê rastî muameleya xerab hatine agahiyên nû parve kirin. Gokçe, diyar kir ku piştî bûyera 21'ê Kanûnê bi 4 zarokan re axivî û wiah got: "4 zarokên ku me bi wan re hevdîtin kir, diyar kirin ku zarok berê ji aliyê gardiyanan ve rastî lêdanê hatibûn."
Li Girtîgeha Zarokan a Sincanê ya Enqereyê di 21'ê Kanûna 2018'ê di saetên êvarî de bûyer derketibû. Serdozgeriya Komarê ya ENqereyê, diyar kiribû ku di bûyerê de 6 zarok û 14 gardiyan birîndar bûne. Piştî bûyerê di roja ewil de parêzeran xwest biçin bi zarokan re hevdîtin bikin lê nekarîbû hevdîtinê bikin. Roja dîtir Endamên Komîsyona Girtîgehan a Baroya Enqereyê çûn bi zarokan re hevditin kirin. Endamê Komîsyona Girtîgehan a Baroya Enqereyê Prz. Fatih Gokçe, têkildarî zarokên li Girtigeha Zarokan a Sîncanê rastî muameleya xerab hatine agahiyên nû bi Ajansa Mezopotamya (MA) re parve kirin. Gokçe, diyar kir ku piştî bûyera 21'ê Kanûnê bi 4 zarokan re axivî û wiah got: "Di 21'ê Kanûnê de piştî bûyer hat bihîstin em bi lez çûn girtîgehê. Ji parêzerê ewil çû cihê bûyerê ez bûm. Ez ji nîzamiyê derbasî hundir bûm. Min got ez hatime girtîgeha zarokan. Lê ez nexistim hundir. Ji ber bûyerê ez negirtim hundir. Ewil gotin serwîs tune ye. Min got ezê bimeşim. Piştre telefonî îdareya girtîgehê kirin. Lê ji bo ku min nexin girtîgehê ketin nava hewldanan. Rêveberiya Girtîgehê ji gardiyanan re got 'Kesî nexin hundir. Ez nexistim hundir.
‘BI ŞEV 7-8 AMBULANS KETIN GIRTÎGEHÊ Û DERKETIN'
Gokçe, anî ziman ku serpêhatiyên xwe bi rêveberiya baro û parêzerên din re parve kir û wiha got: "Piştre ji baroyê heyetek hat. Lê we jî li nîzamiyê rawestandin û nexistin hundir. Heta nîvê şevê li ber girtîgehê rawestiyan. Dema ez li nîzamiyê bûm 7-8 ambulan ketin û derketin. Tev diçûn girtîgeha zarokan. Maşîneyên sewqa taybet diçûn û dihatin. Roja dîtir ez dîsa çûm girtîgehê. Min xwest bi muwekilê xwe yê zarok re hevdîtin bikim. Ez demek dirêj rawestandim. Agahiyên nasnameya min girtin. Gotin 'Hûn kî ne? Em dê lêpirsîna we bikin' Piştre ez fêr bûm ku muwekilê min ji ber bûyerê duh sewq kiribûn. Agahî nedan ku ew birine ku. Ji ber vê yekê min nekarîbû bi muwekilê xwe re hevdîtin bikim.
‘HÊJ EM NAVÊ ZAROKÊN MEXDÛR BÛNE NIZANIN'
Gokçe, destnîşan kir ku piştî heyeta Komîsyona Girtîgehan a Baroya Enqereyê û parêzerên ji Navenda Mafên Zarokan hatin dîsa çûn girtîgeha Zarokan. Gokçe, anî ziman ku nêzî 3 saetan hatin rawestandin. Piştre em çûn bi zaroken din re me hevditin kir. Me nekarîbû bi zarokên mexdûr re hevdîtin bikin. Me bi rêveberiya girtîgehê re hevdîtin kir. Lê me nikarîbû bi zarokên mexdûr re hevdîtinê bikin. Me nafê zarokên mexdûr jî fêr nekir. Tevî hemû hewldanan em hêj navê zarokên mexdûr nizanin."
RÊVEBERIYA GIRTÎGEHÊ LI MALBATÊN ZAROKAN JÎ NEGERIYA
Gokçe, anî ziman ku rêveberiya girtîgehê diyar kiriye ku bûyer pir mezin hatiye nîşandan û wiha got: "Rêveberiya girtîgehê gotin 'Bûyerek wisa mezin tune ye.Çapemeniyê pir mezin kiriye'. Gotin weliyên zarokan li me negeriyan. Ev ji xuya dike ku zarokên li vê girtîgehê zarokên bê xwedî ne. Di heman rojê de parêzer bi 4 zarokên bûne şahid re hevdîtin kirin. Zarokan diyar kirin ku zarokên mexdûr berê jî rastî lêdanê hatine. Zarok tirsiyan ku agahiyên zelal û saxlem bidin. Zarokekî diyar kir ku wî piyê gardiyanekî bi xwîn dîtiye. Ew xwîn îhtîmalek mezin ne ya gardiyan bû. Bawerim zarok tirsandin û ji ber vê yekê zarokan her tişt negot.
ZAROK FÊRÎ MUAMELEYA XERAB KIRINE
Gokçe, da zanîn ku wî ferk kir ku zarok fêrî muameleya xerab kirine û êdî muameleya xerab ji bo wan bûye tiştekî ji rêzê. Gokçe, wiha got: "Zarok êdî muameleya xerab a gardiyanan tiştekî xwezayî û ji rêzê dibînin. Dema min pirsî çima gardiyan li we dixin. Zarok got "Em bi roj radikevin. Divê em rakevin. Ji ber ku em radikevin tê li me dixin. Zarokan diyar kirin ku gardiyan her dem li wan dixin. 4 zarokên ku me bi wan re hevdîtin kirin diyar kirin ku gardiyan her dem li wan dixin. Rêveberiya girtîgehê jî nexwest agahiyan bidin. Li hundirê kampusê me bi kesên din re hevditin kirin. Wan jî diyar kirin ku 10-15 otobusan zarok şandin nexweşxaneya kampusê. Lê dema me ev ji rêveberiya girtîgehê pirsî, ev yek înkar kirin. Lê gotin 6 zarokan êrîşî wan kirine û 7-8 gardiyan birîndar bûne. Berî bûyer pêk bê zarok rasti lêdana gardiyanan hatibûn."
Gokçe, destnîşan kir ku hem Komîsyona Girtîgehan a Baroya Enqereyê û hem jî Navenda Mafên Zarokan bûyerê dişopînin û dê heta dawî bişopînin. Gokçe, anî ziman ku berê jî dişopandin û ji niha û şûnde jî dê bişopînin û bi rêxistinên sivîl ên mafên mirovan dişopînin re têbikoşin.
MA / Berivan Altan