Li Kizilcakoy a navçeya Efeler a Aydinê, Şîrketa Enerjiyê ya Gurmatê dixwaze Santrala Enerjiyê ya Jeotermalê (JES) çêbike. Şêniyên gund ji bo JES neyê çêkirin 5 meh in nobetê digirtin. Di 6'ê Kanûnê de derdora erdê ku tê xwestin JES lê bê çêkirin bi têlan hat girtin û darên li derdorê hatin rakirin. Li ser vê şêniyên gund bertek nîşan dan û di mudaxilekirina cendirmeyan de 3 jin hatibûn derbkirin. Çalakiya nobetê ya şêniyên gund didome.

 

Leyla Çiyan Şen, bilêv kir ku wexta wan dît li nav erdê tê xwestin JES lê bên çêkirin liv û tevgerek heye, ji 7 saliyan heta 70 saliyan gundî tev çûne wir. Şen, diyar kir ku cendirmeyan rêya wan biriye û li nasnameyên wan nêriye. Şen, destnîşan kir ku wexta ew çûne wir dîtine ku qada tê xwestin JES lê bên çêkirin bi têlan tê girtin, lê belê wan nehiştiye têl bên bicihkirin. Şen got: "Em û cendirmeyan hinekî pev ketin. Ez çûm koncala ku ji bo têlan dîreg lê hatiye çikandin û min nehişt têl bê kişandin. Didîtin ez di kocalê de me, lê dîsa jî çîmento bera koncalê didan û heta çonga xwe di nav çîmentoyê de mam. Paşê min ji nava xwe derb xwar. Bêhna min çikiya û ji ser hişê xwe ve çûm. Min birin nexweşxaneyê û bijîşkan got divê 24 saetan di muşahadeyê de bimînî. Min got, gundê me bi zext û zoriyan re rû bi rû ye ez namînim û min berê xwe da nav erd." 

 

‘HETA RAPORA ÇED'Ê BÊ EM Ê LI VIR BIN' 

 

Şen, diyar kir ku wê tevî gundiyan heta saet 11'ê şevê li nav erd nobetê girtiye û got: "Me tevî ciwanan heta serê sibehê nobet girt. Serê sibehê saet di 4'an de têl kişandine. Çawa em çûn cem têlan cendirmeyan gaz reşand ser me. Wexta fermandar hat me got divê walî bê. Piştî demekê alîgirê walî û Baroya Îzmîrê hat. Got, heta dadgeh biryarê nede divê kes dest nede vêq adê. Niha bûyer sekinîne. Wê ev bêdengî heta Nîsanê dewam bike. Wê piştî Nîsanê bi ser me de bên. Lê em nobeta xwe digirin. Heta rapora ÇED'ê bê em ê li vir bin. Heta JES ji vir neçin em ê jî neçin." 

 

‘EM Ê LI BER XWE BIDIN' 

 

Hatîce Barlaz jî anî ziman ku bi mehan e ew li dijî çêkirina JES'an nobetê digirin. Barlaz, diyar kir ku roja rageşî çêbû gaz avêtine wan û got: "Min ji cendirmeyan got, ev dixwazin zarokên me, xaka me jehrî bikin. Roja din jî ji bo em nehêlin têlan bicih bikin em çûn nav erd. Ew bi ser me de dihatin, me jî li ber xwe dida. Yekş ji min re got 'bicehime ji vir, tu jina mezin î.' Wexta min jî got 'tu min bikujî jî ez ê neçim', fermandar ez tehm dam. Wê kêliyê milê min li betonê ket û xwîn jê hat. Em 3 kes çûn nexweşxaneyê. Paşê girtek hatin nivîsandin. Yekî ji wan ji min re got bi şaşî çêbûye, min qebûl nekir û min got 'bi qesdî dikin.' Roja din em careke din çûn qadê. Lê vê carê gaz avêtin me. Hin ji me ji ser hişên xwe çûn. Di heyata xwe de cara ewil bûm min gaz dixwar. Min nizanibû çî ye. Bêhna min dernediket. Me ji wan re got, em bimirin jî em ê axa xwe ji we re nehêlin. Ji wê rojê ve wekî her tim nobet dewam dike. Em ê li pêşiya dozeran xwe dirêjkirin, lê qethiyen em ê nehêlin bîr bên kolandin. Em ê heta dawiyê li ber xwe bidin." 

 

MA / Ayşe Surme