Hevserokê HDP'ê yê Giştî Sezaî Temellî tev li kongreya asayî ya 3'yemîn a HDP'a Sancaktepe ya Stenbolê bû. Dayikên Şemiyê, rêveberên Partiya Karkeran a Tirkiyeyê (TÎP), aktivîst û rêveberên Tevgera Jinên Azad (TJA) jî di nav de gelek kes tev li kongreyê bûn. Piştî rêzgirtinê kongre dest pê kir û Temellî axivî û ji bo şert û mercên heyî got, 'faşîzm' e û diyar kir, ew ê bi hev re têbikoşin û dawiya dawî faşîzmê têk bibin.

 

'DENGÊ GUVENÊ LI DIJÎ FAŞÎZMÊ Û ŞER E'

 

Temellî got, heta ku aştî pêk were wê têkoşîna wan bidome û wiha dewam kir: "Leyla Guven ku 32 roj in di greva birçîbûnê de ye, rê li ber me dixe. Ev îrade li refên herî pêş dimeşe û rêya me vedike. Divê her kes hurmetê nîşanî vê îradeyê bide. Dem dema ku dengê Leyla Guven bê bihîstin. Lewma divê kes li benda tiştekî nemîne. Bû 32 roj, lê belê hîn beşeke mezin a raya giştî Leyla Guven ji nedîtî ve tê. Parlamento Leyla Guven ji nedîtî ve tê, weke ku Leyla Guven nîne bêxem e. Leyla Guven heye, dengê wê heye, îradeya wê heye. Bivê nevê hûnê vî dengî bibihîzin, ji ber ku dengê Leyla Guven dengê rastiyê ye. Dengê li dijî faşîzm, zext, zilm û şer e.

 

Kî vî dengî bilind dike, kî alîgirê aştî, demokrasî û îradeya paşeroja hevpar e, dibe hedefa rejîma Erdogan. Dewlet êrîşî wan dike. Mîna Sirri Sureyya Onder ku bi berpirsyariya aştî û demokrasiyê rabû. Sirri Sureyya Onder xistin girtîgehê. Ne ku ji ber ceza kiriye, lê ji ber alîgirê aştiyê ye, bû hedefa êrîşa dewletê. Bi hêrsa tolhildanê zilmê li hevrêyên me dikin. Bi hezaran hevalên me girtî ne, bi hezaran hevalên me neçar man welêt biterikînin. Van hevalên me aştî xwestin, demokrasî xwestin û gotin, 'werin em li welatekî hevpar di nava komara demokratîk de bi hev re bin'. Ya ku li dijî vê daxwaza wan hate kirin ev e.

 

Ev dewlet aştiyê naxwaze, demokrasiyê naxwaze, şer dixwaze. Ev dewlet dixwaze bi desthilatdariyeke ku xwe ji dijminatiya li kurdan xwedî dike bimeşe. Em jî dibêjin, 'Em ê dawî li vê dijminatiyê, li vî şerî û li vê zilmê bînin'. Ji ber ku em xwedî îrade ne, xwedî rêxistinbûneke xurt in. Li pişt van hemûyan jî nêrîneke me ya qewîn heye... Silav ji xwediyê vê nêrînê re, silav ji Îmraliyê re, silav ji Ocalan re."

 

DIVÊ TECRÎD WERE RAKIRIN

 

Temellî diyar kir ku divê tecrîd bê rakirin û got: "Eger tecrîd neqede ev welat wê bikeve nava felaketê, wê ber bi hilweşînê ve biçe. Ne tenê ev welat, Rojhilata Navîn jî ber bi felaketê ve diçe. Rojhilata Navîn bûye qada şer. Li her derê çete hene, zeytûnan talan dikin, bi rengekî namerdî êrîşê dibin ser Efrînê. Niha Rojava dikin hedef. Bi çeteyên li Îdlibê re hevkariyê dikin. Ji ber ku derdê wan ew e ku bi kurdan re jiyaneke hevpar neyê afirandin.

 

Halbûkî gelên qewîm ên vê erdnîgariyê îradeya xwe ya ji bo jiyana bi hev re nîşan da. Ji bo ev îrade neyê dîtin, tecrîdê ferz dikin. Lewma divê tecrîd biqede. Gelên Tirkiyeyê, kedkar, jin û her kesên li vê erdnîgariyê ne, divê xwedî li îradeya aştiyê ya gelan derkevin. Ev yek jî bi têkoşîna hevpar, bi xwedîderketina li dengê Leyla Guven dibe."

 

'EM Ê TIRKIYEYÊ JI FERASETA QEYÛMAN RIZGAR BIKIN'

 

Temellî bal kişand ser desteserkirina şaredariyan ên bi polîtîkayên qeyûmî hatin desteserkirin û hilbijartina herêmî jî û got: "Ji 102 şaredariyên me qeyûm tayînî 96 şaredariyan hatin kirin. Em ê van şaredariyên xwe ji feraseta qeyûman safî bikin û bsitînin. Tenê ne 102 şaredarî, em ê bêtir şaredariyan bi dets bixin. Her wiha eger em bi tena serê xwe bikaribin ji derheqê îktîdarê derkevin, ji bo em ji vê îtifaqa cumhûr ya li ser asasên feraseta yekzilamî ye xelas bibin em ê li hemû deverên Tirkiyeyê mil bidin milên hêzên demokrasiyê. Em ê Tirkiyeyê ji feraseta qeyûmî rizgar bikin." 

 

Temellî piştî axaftina xwe ji Sancaktepeyê berê xwe da Kartalê û tev li kongreya HDP'a Kartalê bû.