EDENE / HATAY – Rêxistinên navçeyên Çukurova û Defne yên HDP’ê rêveberiya xwe ya nû bijartin. Parlamentera HDP’ê ya Edeneyê Tulay Hatîmogullari di kongreya Çukurovayê de axivî û got: “Em ê jî li derve bibin dengê Leyla Guven.”
Rêxistina Partiya Demokratîk a Gelan (HDP) a Çukurova 3’yemîn Kongreya xwe ya Awarte li dar xist. Kongre li Salona Dogal Park Balo pêk hat û Parlamentera HDP’ê ya Edeneyê Tulay Hatîmogullari beşdar bû.
Hatîmogullari di kongreyê de axivî û bal kişand ser zextên partiya xwe û got: “Van êrîşên li dijî HDP’ê pêk tên ji sedî 5 li dijî AKP’ê pêk bihatana niha partiyek bi navê AKP’ê nemabû. Em li dijî van zext û êrîşên AKP’ê bi berxwedanê têdikoşin.”
‘BIRÊZ OCALAN REMZA FIKRÊ AŞTIYÊ YE’
Hatimogullari bal kişand ser biryara DMME’yê ya berdana Selahattîn Demîrtaş û xwest biryara DMME’yê pêk were û Demîrtaş demildest bê berdan. Hatimogullari li ser çalakiya greva birçîbûnê ya Leyla Guven a li dijî tecrîdkirina Rêberê PKK’ê Abdullah Ocalan dest pê kiriye rawestiya û got: “Daxwaza Leyla Guven ne berdana wê ye. Birêz Guven rakirina tecrîdkirina birêz Ocalan dixwaze. Em ê jî li derve bibin dengê Leyla Guven û ji bo tecrîd rabe em ê têbikoşin. Birêz Ocalan remza fikrê aştiya Tirkiyeyê û Rojhilata Navîn e.”
Piştî axaftinê raporên xebat û malî hatin xwendin. Di hilbijartina yek lîsteyê de Zarîf Sevîn û Cemîl Kabaîş bûn hevserokê rêxistina HDP’ê.
HATAY
Rêxistina HDP’ê ya navçeya Defne ya Hatayê jî 1’emîn Kongreya xwe ya Awarte li avahiya HDP’a Bajêr pêk anî. Parlamenterê HDP’ê yê Edeneyê Kemal Pekoz û gelek kes beşdarî kongreyê bûn. Piştî hilbijartina dîwanê û rêzgirtinê Parlamenter Pekoz axivî û bal kişand ser çalakiya Leyla Guven û got daxwazên wê daxwazên wan in.
Piştî axaftinan hilbijartin pêk hat û Sûzan Mîroglu û Vaîl Çelîk ji hevserokatiyê re hatin bijartin.