STENBOL - Selvî Gulmez ku ji bo piştevaniyê 22 sal in li Qada Galatasarayê li cem Dayikên Şemiyê ye, 23 sal in jî herdem diçe girtîgehan. Gulmez dixwaze kurê wê yê nexweş ê 18 sal in di hucreyeke yekkesî de ye bê tedawîkirin.
Selvî Gulmez a 80 salî ku ji sala 1996'an ve ji bo piştevaniyê li Qada Galatasaryê li cem Dayikên Şemiyê ye, tevî hemû zext û zoriyan jî dev ji têkoşîna xwe berneda. Tevî vê Gulmez ji sala 1995'an ve jî tim diçû gitîgehê û serdana keça xwe Nergîz Gulmezê dikir. Keça wê Nergîz Gulmez di 19'ê Kanûna 2000'î de ketibû rojiya mirinê û di roja 123'yan a rojiya mirinê de mir. Her wiha sala ku keça wê mir vê carê kurê wê Alî Gulmez hat girtin
niha kurê wê di Girtîgeha Tîpa F a Bolûyê de ye.
Gulmez, bilêv kir ku sala keça wê mir kurê wê Alî Gulmez hatiye girtin û 18 sal in kurê wê di hucreyeke yekkesî de ye, nexweş e û nayê tedawîkirin. Gulmez got: "Mîzoka kurê min nerihet e û basûra wî heye. Wexta li Girtîgeha Edîrneyê bû dermanê wî didanê. Lê li Bolûyê ne wî dibin bijîşk ne jî dermanê wî didin. Min name ji Wezareta Dadê re nivîsand. Min gilî kir. Cihê lê dimîne bi ritam e. Loma astim jî lê peyda bûye. Nabêjim 'kurê min berdin û wî bibim malê.' Dixwazim kurê min sewqî Girtîgeha Kandirayê bê kirin, dermanê wî bidinê û bê tedawîkirin."
‘TÎPA F ZILM E'
Gulmez, destnîşan kir ku şert û mercên Girtîgeha Bolûyê xirab in û got: "Nahêlin sporê bikin. Cihê lê dimîne bêhewa ye. Ser hewadariyê jî bi têlan girtine. Li hin girtîgehan tenê ji bo du saetan wan derdixin hewadariyê. Li hin girtîgehan jî mehê carekê hevdîtina vekirî heye. Lê li vir du mehan carekê ye. Wexta diçim girtîgehê dibêjim 'Qey Bolû girtîgeha dewleteke din e? Ma ên li vir ne mirov in?' Dikenin. Nahêli neviyên min û bûka min ji bo hevdîtinê biçin. Wexta bi telefonê li me digere, jê re dibêjin kunyeya xwe bixwîne. Ew jî naxwîne. Ji ber vê telefonê digirin. Tîpa F zilm e."
23 SAL IN DIÇE Û TÊ
Gulmez çend meh berê cara heftan emeliyat bû û tevî vî emrê xwe û nexweşîna xwe di hemû hevdîtinên vekirî de bi tena serê xwe ji Stenbolê diçe Bolûyê. Gulmez bi bîr xist 23 sal in em diçe girtîgehê û tê û got: "Rojekê jî li ber deriyê girtîgehê negiriyam. Çi li ser min hebe derdixin. Gopalê min jî ji min distînin. Lê ev ji bo min ne xem e. Xema min ew e kurê min bibin nexweşxaneyê, wî tedawî bikin û dermanên wî bidinê."
MA / Melike Ceyhan