Bi pêşengiya hevkarên Tevgera Jinên Azad (TJA) û Meclîsa Jinan a Partiya Demokratîk a Gelan (HDP) Konferansa Jinan a bi dirûşmeya 'Rêxistinbûyîna me azadiya me ye' li Salona Konferansê ya Vedat Aydin a avahiya Partiya Demokratîk a Gelan (HDP) dest pê kir. Li salona konferansê wêneyên Sevê Demir, Pakize Nayır û Fatma yên di serdema qedexeya derketina derve ya Silopiyayê de jiyana xwe ji dest dan û yên Sakine Cansız, Fidan Dogan û Leyla Şaylemez ku li Parîsê hatin kuştin hat daliqandin. Dîsan pankartên "Em ê qirkirina li ser jinan bidin rawestandin û jiyanê azad bikin" û "Rêxistinbûyîna me azadiya me ye" bi salonê ve hatin kirin. Gelek aktîvîstên TJA û endamên Meclîsa Jinan HDP’ê beşdarî konferasnê bûn. Jinan kincên gelêrî li xwe kirin û berî ku konferans dest pê bike li salona konferansê govend gerandin, dirûşmeyên "Jin, jiyan, azadî", "Bijî berxwedana zindanan" û "Bê Serok jiyan nabe" berz kirin. 

 

Piştî deqeyek rêzgirtin a ji bo têkoşerên azadiyê sinevizyona ku peyama Hevseroka KCD'ê û parlamentera HDP'ê ya Colemêrgê Leyla Guven a ku 24 roj in di greva birçîbûnê de ye, tê de cih digirt û mijara serîhildana jinan rave dikir hat temaşekirin. Piştî hilbijartina dîwanê peyama  Hevseroka KCD’ê Leyla Guven a ji girtîgehê ji konferansê re şandî hat xwendin.

 

'EV TÊKOŞÎNEK REWAYE Û EMÊ BI SER BIKEVIN'

 

Peyama Guven wiha bû: “Ez konferansa we silav dikim. Ez hemû jinên ku li derve piştgiriyê didin min silav dikim. Ez silavên xwe bi taybetî ji Dayîkên Aştiyê re dişînim. Ji bo protestokirina tecrîda li ser gelê Kurd û tecrîdê min dest bi vê çalakiyê kir. Heta ku ez bersivê bistînim, ez ê çalakiya xwe bidomînim. Ez dizanim ku ev têkoşîneke rewa ye û em ê bi ser bikevin.”

 

‘EM VÊ HIŞMENDIYÊ NAS DIKIN’

 

Hevberdevka Meclîsa Jinan a HDP’ê Dîloan Dîrayet Taşdemîr, dûre axaftina vekirinê ya konferansê kir û wiha got: “Polîtîkayên ji Rojhilat heya Başûr tên birêve birin, polîtîkayên înkar û pişavtinê ne. Em baş dizanin ku desthilatdar ne tenê îro, bi sedsalane van polîtîkayan bi rêve dibin. Êdî gihaya wê astê ku navê jinan jî qedexe dikin. Li hemû cihan êrîş li ser jinan hene. Em vê hişmdiyê di şexsê tecrît de, rêhevalên me yên dilgirtî û komkujiya jinan de baş nas dikin. Di heman demê de em dikarin bêjin tu caran jinan li hemberî van êrîşan serî netewandin û dê tu carî teslîm nebin. Jin tenê di 25’ê Mijdarê de li dijî tundiya jinan dernakevin qadan, di heman demê de li dijî polîtîka û siyaseta li ser jinan jî derdikevin qadan û kolanan.”

 

 'BERXWEDANA LI DIJÎ TECRÎDÊ GIRÎNG E'

 

Taşdemîr, bal kişand ser çalakiya Guven û wiha bilêv kir: “Daxwazên Leyla Guven daxwazên me hemûyane û em hemû li dijî tecrîdê ne. Îro Guven bûye dengê me hemûyan û emê jî li her derê bibin dengê Guven. Emê li dijî tecrîdê çalakiyên xwe mezintir bikin. Tecrîta li ser Birêz Abdullah Ocalan, di heman demê tecrîda li ser gelê Kurd û hemû gelên Rojhilata Navîne. Tecrîd li dijî jin, demokrasiyê, aştî, wekhevî û bi hevrebûna gelane. Em weke jinên HDP’ê dibin tecrîdê dene û tecrîda li ser xwe qebûl nakin. Ji ber vê divê em azadiya Birêz Ocalan di rojevê de bigirin û li dijî tecrîdê têkoşîna xwe berfireh bikin.”

 

 'PEYWIRA HERÎ MEZIN LI SER MILÊ ME YE’

 

Taşdemîr, pêvajoya hilbijartina herêmî ya 31’ê Mijdarê jî nirxand û wiha dawî li axaftina xwe anî: “Li pêşiya me hilbijartinek heye. Ev hilbijartin ji me roja hesap pirsînê ye. Di têkoşîna me ya çil salan de, me gelek serkeftin bi dest xistin û her awayî êrîşî destkeftiyên me kirin. Tarzê rêveberiya me weke taloke dîtin û ji ber vê hevserok û hevşaredarên me kirin girtîgehan.  Emê di vê hilbijartinê de bersivek xurt bidin wan. Di vê pêvajoyê de peywira herî mezin dikeve li ser milê me jinan. Em ê di vê pêvajoyê de têkoşîna xwe mezintir bikin û encamên xurt bi dest bixin.”

 

Piştî axaftina Taşdemîr, konferans ji çapemeniyê re girtî berdewam dike.