Hilbjartina rêveberiyên herêmî ya 31'ê Adarê nêzîk ma. Êdî hemû partiyên siyasî ji bo hilbijartina rêveberiyên herêmî dest bi amadekariyan dikin. AKP'ê namzetên xwe yên gelek bajaran diyar kir. Tifaqa AKP- MHP'ê di hilbijartina rêveberiyên herêmî de jî teqez bû. Serokê MHP'ê Bahçelî diyar kir ku li Stenbol Enqere û Îzmirê namzetan nîşan nadin. Ji niha de Enqere, Îstanbul û Îzmir ji AKP'ê re hişt. Li aliyê din Partiya Demokratîk a Gelan (HDP) diyar kir ku di navbera 20'ê Mijdar û 5'ê Kanûnê de dê serlêdanên ji bo bernamzetan bê kirin. Serlêdanên bernamzetan didome. Tê payin ku HDP bi riya sindoqan namzetên xwe diyar bike. Li aliyê din hevditinên CHP,  ÎYÎ Partî û Partiya Saadetê berdewam dikin. Parlamentera CHP'ê ya Berê Melda Onur, bal kişand ser nêzîkatiya partiyên îktîdarê û muxalif yên ji bo hilbijartina rêveberiyên herêmî. 

 

BINGEHA CHP Û HDP'Ê NÊZÎ HEV IN

 

Onur, bal kişand ser rexneya “CHP ji ber fobîya kurd nêzî HDP'ê nabe" û wiha got: "CHP difikire ku hevdîtinên li pêş civakê dê wan pûç bike. Lê bingeha CHP û HDP’ê nêzî hevin. Her çend xetên sor ên CHP û HDP'ê ji hev cuda bin jî, lê bingeha CHP û HDP'ê nêzî hev in.  Xuya ye ku du partî vê hevdîtinê aşkere nakin. Her çend li pêş çavê gel pêk neyê jî hin organên partiyan di navbera herdu partiyan de hevdîtin dikin. Li vin ji Tirkiye wêdetir ya girîng Stenbol e. Namzetê Şaredariya Bajarê Mezin a Stenbolê pir girîng û diyarker e. Dikare li navçeyan hevkariya hev bikin. Divê demek berê namzetê Şaredariya Mezin a Stenbolê diyar bikin. Ger ku namzetek bê nasîn û kelecanê çêke dê partiyên din jî eleqe û baldariyê nişan bidin. Divê namzetekî ku kelecan û bendewariya gel zêde bike bê diyarkirin. Ji xwe tişta herî zêde îktîdarê ditirsîne jî ev e. 

 

‘DIVÊ XEBATA TEKNÎK BÊ KIRIN'

 

Onur xwest ji cerebeyên hilbijartina 24'ê Hezîranê ders bên derxistin û ji bo di vê hilbijartina rêveberiyên herêmî de heman kêmasî û şaşî nebin û wiha axivî: "Divê di nava 4 mehan de hem namzetên xwe diyar bikin û hem jî têkiliyên xwe yên bi partiyên din re amade bikin. Tenê ne ji bo hevşaredaran, divê ji bo parastina sindoqan jî amadekarî û hevkariyên xwe bikin. Em gelek cihan qezenç dikin, lê di jimartina dengan a li ser sondaqan de kêmasî hene. Ji ber em baş sindoqan û jimartina dengan naparêzin em li gelek ciwan winda dikin. Ji bo şaşiyên berê dubare nebin, divê ji niha de amadekariyên teknîkî baş bên kirin û dubare nebin."

 

'TÊKILIYA AKP-MHP'Ê LI BER ŞIKANDINÊ YE' 

 

Onur, da zanîn ku têkilî û hevkariya AKP-MHP'ê li ser berjewendiyan hatiye avakirin û bi aşkerekirina namzetan îtîfaqa AKP-MHP'ê ji nûve hatiye avairin û wiha lê zêde kir: "Daxwazên wan ne hevpar in. Her yek li xwe difikire. Em îtîfaqa wan baş naxînin. Me îtîfaqa AKP-MHP'e wekî ji bo xelasiya MHP’ê girt dest. Lê hat dîtin ku ji bo xelasiya AKP’ê bû. Ji ber ku MHP nebe hilbijartin jî nedibû. Niha em dibînin ku dîsa mecbûrî hev in. Ji ber vê yekê dîsa hatin cem hev."

 

'STENBAL GIRÎNG E' 

 

Onur, bal kişand ser rewşa Stenbolê û wiha pêde çû: "Stenbol ji bo hemû partiyan girînig e. "Tê xwestin ku namzetekî wisa hebe ku bingeha CHP’ê bêzar neke.  Dixwaze li gorî pîvanên demokrat û civakî tev bigere. Ya din naxwaze yekî ji derve bîne. Dixwazin azadîparêz be. Dixwaze parazvanê gel û alîgirê aştiyê be. Divê disa milê muhafazakar netirsîne. " 

 

‘HDP DENG NADE KESÊN LI DIJÎ FIKRÊN XWE'

 

Onur, bal kişand ser bingeha HDP'ê ya Stenbolê û wiha berdewam kir: "Hilbijêrên HDP'ê li navçeyan kesekî li gorî xet û fikra wan be dê dengê xwe bidin, lê kesekî li dijî xeta wan be dengê xwe nadin ev pir zelal e. HDP zelal e. Deng nade yên li dijî tezên HDP'ê. Ji ber vê yekê hevkarî û tevkarî li herêman şert e. Li aliyekî partiyên muhafazakar dibin yek, lê partiyên din ên muxalif ew qas belavbûyî bin dê mahkûmî faşîzma îktîdarê bibin. 

 

‘BI OPERASYONAN DIXWAZIN HÊZA HDP'Ê BIŞKÎNIN'

 

Onur, bal kişand ser operasyonên li dijî eniya HDP’ê û wiha bi dawî kir: "Bi van operasyonên siyasî yên binçavkirin û girtinê, dixwazin hêza HDP'ê bişkînin. Rêxistinek girîng e. Bi hêzanî hêza wê nayê şikandin. Lê dixwazin kesên li ser sindoqan û xebatê bimeşînin asteng bikin. Kesên karê hilbijartinê bimeşînin û sindoqan biparêzin îro li girtîgehê ne. Erdogan got 'Hewce be em dê dîsa qeyûm tayin bikin' Ev aliyê bê şirovekirin tune. Li vir nîzama qanûna bingehîn tune. Hilweşiya. Ger hûn li wê herêmê beriya hilbijartinê qeyûm îlan bikin, we ji niha de nîzama qanûnên bingehîn û qanûn hilweşandiye. Em dibînin ku nêzî hilbijartinê îktîdar betir xwe hişk dike. Her sal destûr didan meşa jinê. Lê îsal meşa jinê asteng kirin. Ji ber vê yekê îtîfaqên li herêmê girîng in. Li herêmê kîjan enî dikare bi kijan eniyê re bên cem hev. Li şûna îtîfaqa jor, divê îtîfaqên herêmî bên kirin. Divê li gorî her navçe û bajarî profilek bê diyar kirin û li gorî wî profîlî amadekariyên îtîfaqê bên kirin. Ger ku ne wisa be CHP-HDP nikarin vî barî rakin. Ji ber ku niha hemû medya di destê wan de ye û bi medya her tiştî li gorî xwe derdixin pêş. Li ser derewan hişekî ava dikin. 

 

'EM DIXWAZIN DI ŞAREDARIYAN DE JINÊ BIBÎNIN' 

 

Melda Onur, herî dawî destnîşan kir ku ew di vê hilbijartina rêveberiyên herêmî de dixwazin jinê jî bibînin û wiha bi dawî kir: "Ez nabêjim bila îlla jin şaredar bin. Dê divê meclîsên şaredariyê giraniya rêjeyê jin bin. 

Cihekî wekî Beşiktaşê ez naxwazim jin di rêza 11’an de cih bigirin. Jin di karê şaredariyan de pir jêhatîne." 

 

MA/ Necla Demîr