Li Girtîgeha Tîpa E ya Amedê çalakiya greva birçîbûnê ya Hevseroka Kongreya Civaka Demokratîk (KCD) û Parlementera HDP'ê ya Colemêrgê Leyla Guvenê ku ji bo dawî li tecrîdkirina Rêberê PKK'ê Abdullah Ocalan bê dabû destpêkirin di roja 24'an de ye. Hevbervdekê Partiya Keskan û Pêşeroja Çepgiriyê Nacî Sonmez, Hevserokê Giştî yê SYKP'ê Cavît Ûgûr û Hevserokê SYKP'ê yê berê Ahmet Kaya çalakiya greva birçîbûnê ya Guvenê nirxandin û gotin divê rojavayê Tirkiyeyê jîd estekê bide çalakiya Guvenê. 

 

SONMEZ: DIVÊ HERKES BIBE BERSIVA QÎRÎNA GUVENÊ 

 

Nacî Sonmez got: "Ez siyaseteke ku ne mirinê lê jiyanê referans digire diparêzim. Lê li vî welatî mirov ji bo dengê xwe ragihînin bedena xwe ber bi mirinê ve dşînin. Hem ji ber mirov im di warê wijdanî de û hem jî ji ber siyasetmdar im di warê ehlaqî de li ber dikevim. Ev pêkanîn tenê li welatê me diqewimin. Loma ez grevên birçûbûnê destek nakim, lê divê rojek berî rojekê herkes bibe bersiva vê qîrîniyê. Bang li rayedaran, hikûmetê û siyasetmedaran dikim ku bersiva qîrîniya Guvenê bidin û  bersiveke erênî bidin." 

 

Sonmez, anî ziman ku li herêmê destek ji bi çalakiya Leyla Guvenê heye, lê divê rojavayê welat jî destekê bide vê çalakiyê û got: "Bi taybetî li rojavayê Tirkiyeyê ji ber zext û zoriyên dewletê muxalefet bi paş ve kişiyaye. Ev ji bo me hemûyan cihê endîşeyan e. Yanî mirov dikare bêje pirsgirêka Tirkiyeyê prisgirêka bêmuxalefetiyê ye. Lê çare ew e divê tevgereke civakî ya nû bê avakirin. Divê li Tirkiyeyê aqlê muxalefetê bê çêkirin û çalakiya vê yekê bê rêxistinkirin." 

 

KAYA: DAXWAZEKE MAFDAR E 

 

Hevserokê Giştî yê SYKP'Ê yê berê Ahmet Kaya destnîşan kir ku pirsgirêka sereke ya Tirkiyeyê pirsgirêka kurd e û got: "Ger li vî welatî pirsgirêka kurd neyê çareserkirin, wê pirsgirêkên siyasî, aborî û yên din çareser nebin. Çareserkirina pirsgirêka kurd jî bi hevdîtina bi Rêberê Gelê Kurd Abdullah Ocalan re pêkan e. Ger li ser asasekî rast hevdîtin bi Ocalan re bê çêkirin wê ji bo çareserkirina pirsgirêka kurd gaveke girîng bê avêtin. Çalakiya Leyla Guvenê ya di vî warî de daxwazeke mafdar e." 

 

Kaya, diyar kir ku ji bo daxwazên Leyla Guvenê pêk bên divê rayedar demildest tev bigerin û got: "Em li cem parlementera xwe Leyla Guvenê ne." Kaya, bal kişand ser çalakiyên ji bo piştevaniya çalakiya Guvenê jî û destnîşan kir ku divê li gel herêmê rojavayê Tirkiyeyê jî destekê bide vê çalakiyê.

 

Hevserokê Giştî yê SYKP'ê Cavît Ûgûr jî destnîşan kir ku li Tirkiyeyê divê demildest pêşiya rêyên demokratîk bêb vekirin û di serî de pirsgirêka kurd hemû pirsgirêk bi muzakereyê bên çareserkirin û ji bo vê jî divê demildest gavên demokratîk bên avêtin.