AMED – Hevseroka Giştî ya ÎHD’ê Eren Keskîn di çalakiya heftane ya Tahîr Elçî de axivî û got: “Yên vê erdnîgariyê birêve dibin tehamûlî Tahîr Elçî û Hrant Dînk nekirin.” Serokê Baroya Stenbolê yê berê Yucel Sayman jî got: “Tahîr Elçî bi ramanên xwe bêmirin bû.” 

 

Baroya Amedê bi boneya kujerên Serokê Baroya Amedê yê berê Tahîr Elçî yê li ber Mînareya Çar Ling a li navçeya Sûrê hat kuştin derbixin holê di hefteya 152’emîn de li ber Dadgeha Amedê çalakiya xwe dewam kir. 

Gelek parêzer beşdarî çalakiyê bûn û pankarta “Em te ji bîr nakin” hildan. Hevseroka Giştî ya ÎHD’ê Eren Keskîn û Serokê Baroya Stenbolê yê berê Yucel Sayman jî pişgirî dan çalakiyê.

 

 Di çalakiyê de ewilî Serokê Baroya Amedê Cîhan Aydin axivî û diyar kir ku ji bo ew edaletê bînin welêt 152 hefteye li ber dadgehê ne û her çiqas heta niha hewldanên wan encam nedabe jî lê dê têkoşîna xwe edaletê dewam bikin. 

 

'TEHAMULÎ HER DUYAN JÎ NEKIRIN’ 

 

Vê hefteyê Eren Keskîn û Yucel Sayman bûn mêvanê Kursiyê Mafên Mirova ya Tahîr Elçî. Keskîn bal kişand ser kuştina Tahîr Elçî û wiha got: “Kuştina Tahîr Elçî û Hrant Dînk dişibin hev. Her du jî mijarên xetên sor ên vî welatî dianî ziman. Tahîr mirovek wiha bû. Kesayetek her tim aştî dixwest û têkoşîna mafên mirovan dida. Lê yên vê erdnîgariyê birêve dibin tehamulî Tahîr Elçî û Hrant Dînk nekir. Tahîr Elçî wek şêwaza hevalên me yên ku têkoşîna parêzvaniya mafên mirovan didan hat qetilkirin. Heta îro jî kujerên wî nehatin diyarkirin. Heta dawî em ê li pey vê bûyerê bin. Tahîr Elçî bêmirin e.” 

 

'BI RAMANÊN XWE BÊMIRIN E’ 

 

Serokê Baroya Stenbolê yê berê Yucel Sayman jî di çalakiyê de axivî û got: “Em hêvîdarin wê qatilên Tahîr bên girtin. Tahîr Elçî bi ramanên xwe bêmirin bû. Ez hêvîdarim wê di demek nêz de edalet pêk were.” 

 

Daxuyanî piştî çalakiya rûniştinê bi dawî bû.