NAVENDA NÛÇEYAN – Bi boneya 1’ê Mijdarê Roja Kobanê ya Cîhanê li gelek navandan daxuyanî hatin lidarxistin. Di daxuyaniyan de hat gotin Kobanê li dijî hovîtiyê li ber xwe da û dê ev berxwedana wê ya mirovî li cîhanê neyê jibîrkirin û berxwedana vîna mirovan e.
Bi pêşengiya rêxistinên Partiya Demokratîk a Gelan (HDP) li gelek navendan bi boneya 1’ê Mijdarê Roja Kobanê ya Cîhanê daxuyanî û civînên çapemeniyê hatin lidarxistin.
AMED
Rêxistina HDP’ê ya Amedê bi wesîleya 1’ê Mijdarê Roja Kobanê ya Cîhanê bi beşdariya parlamenter û rêveberên xwe û rêveberên DBP’ê li ber avahiya xwe daxuyaniya çapemeniyê li dar xist. Ewilî Hevseroka DBP’a Amedê Naşîde Toprak daxuyanî xwend û bal kişand ser êrîşên dawî yên TSK’ê li dijî Kobanê û got: “Hilbijartina herêmî nêz dibe. AKP ji bo desthialtdariya xwe winda neke, di arîfeya hilbijartinê de welat ber bi senaryoyek din ve dibe û ji bo ranta siyasî bi dest bixe ev sê roj in bi topan êrîşî Kobanê dike. Gurkirina we ya şer dê bibe dawiya desthilatdariya we.” Toprak anî ziman ku azadkirina Kobanê ji bo tevahiya gelê cîhanê bû hêviyek mezin û got: “Kobanê vîna berxwedana jinan û Arîn Mîrxan e. Kobanê ruhê hevpar ên gelan û şervanan e.”
‘HER KESÊ DIÇE HDP’Ê TÊ BINÇAVKIRIN’
Piştî daxuyaniyê Parlamenterê HDP’ê yê Amedê Musa Farisogullari jî axivî û bal kişand ser pêla operasyon û girtina li dijî HDP’ê û got: “Em li vir bang li waliyê bajêr, midûrê emniyeta bajêr û rayedaran dikin. HDP partiyek siyasî ye. Partiyek ku li Kurdistan û Amedê di asta bilind de vîna gel temsîl dike ye. Her tim partiya me dixin dorpêçê. Em vê dorpêçê şermezar dikin. Her mirovê me dikeve hundirên partiyên me û derdikeve hem tacîz dikin û hem jî kesên dikeve hundir wan binçav dikin. Em vê helwestê qebûl nakin.”
Daxuyanî bi berzkirina dirûşmên ji bo Kobanê bi dawî bû.
MÊRDÎN
Rêxistina HDP'a Mêrdînê jî bi minasebeta 1’ê Mijdarê Roja Kobanê ya Cihanê li Parka Karayollari daxûyaniya çapemeniyê pêk anî. Endam û rêveberên HDP’ê yên navend û navçeyan tevlî daxûyaniyê bûn. Li ser navê HDP’ê Hevserokê HDP’ê yê Bajarê Mêrdînê Alî Sîncar daxûyanî xwend. Sîncar got: "Îlankirina 1’ê Mijdarê Roja Kobanê ya Cihanê, vîna gelê Kobanê nîşan daye. Berxwedana li Kobanê ya li dijî hêzên tarî di sedsala 21’ê de di dîrokê de cihê xwe girt. Tu êrîş nikarin vê rastiyê biguherînin. Em berxwedêrên azadiyê, şehîdên berxwedanê bibîr tînin."
Daxûyanî bi lêdana çepikan bi dawî bû.
ÎZMÎR
Rêxistina HDP’a Îzmîrê li avahiya xwe civîna çapemeniyê li dar xist û rêveberên HDP’ê beşdar bûn. Hevseroka HDP’a Îzmîrê Semra Uzunok daxuyanî xwend û got: “DAIŞ’ê bi desteka hêzên kurewî û herêmî jin û zarok di nav de bi hezaran mirov qetil kir. Ev hêza tarî di 2014’an de rastî berxwedana gelê kurd û dostên wan hat. DAIŞ ji aliyê berxwedana pakrewan a Kobanê ve têk çû û ev têkçûn didome. Berxwedana Kobanê di nava rûpelên dîrokî de cih girt û dîrok nivîsand. Li hemû cîhanê deng veda û bû mîraseyek cîhanî.”
EDENE
Rêxistina HDP’a Edeneyê jî bi boneya 1’ê Mijdarê Roja Kobanê ya Cîhanê li ber avahiya partiya xwe daxuyaniya çapemeniyê li dar xist. Pankarta “1’ê Mijdarê Roja Kobanê ya Cîhanê li hemû gelên bindest û baweriyan pîroz be” daliqandin û rêveberên HDP’ê û DBP’ê û gelek kes beşdarî daxuyaniyê bûn. Hevserokê HDP’a Edeneyê M. Mahsun Erîg daxuyanî da. Erîg li dijî êrîşên TSK’ê yên pêr û duh li dijî Kobanê dest pê kirin bertek nîşan da û got: “Bexwedana Kobanê ya bi bedelên gelê kurd û dostên ku bi ser ket bû sembola cîhanê. Berxwedanek derbasî rojên dîrokî bû. Niha jî AKP êrîşî Şoreşa Rojava ku ji Kobanê dest pê kir dike. Tişta duh bi destê DAIŞ’ê dihat kirin, îro bi destê zîhniyeta AKP’ê tê dubarekirin. Ev zihniyet dixwaze destkeftiyên jinan û gelê kurd ji holê rabike. Tu hêz nikare rastiya berxwedana Kobanê ya cîhanî tarî bike.”
STENBOL
Rêxistina HDP'ê ya bajarê Stenbolê bi armanca rojê li avahiya xwe civînek çapemeniyê li dar xist. Di civînê de pankarta "Kobanê ya azad, cîhana azad" hat daliqandin û rêveberên HDP û HDK’ê beşdar bûn. Hevserokê HDP'a Stenbolê Cengîz Çîçek destpêkê axivî û êrîşên TSK’ê yên li dijî Kobanê şermezar kir û got: “Berxwedana li wir tê kirin berxwedana hemû nirxên gerdûnî û mirovahiya pêşverû ye."
Hevserokê DBP'ê yê Stenbolê Alî Riza Bîlgîlî jî diyar kir ku bi têkoşîna demokratîk a gelê Kurd re berxwedana Kobanê mezin bûye û got: "Êrîşa li vê berxwedanê hewldanek ji bo tepisandina gelên li vê derê ye. Lê em ê bi ser bikevin. Têkoşîna me ji bo wê yekê ye ku her kes di nava pîvanên demokratîk de bijîn. Li dijî zext û zilmê wê têkoşîna me bi ser bikeve."
'KOBANÊ PAŞEROJA ME YE'
Endamê Desteya Rêveber a HDK'ê Sedat Şenoglû jî got: "Kobanê ne rabirdûya me ye, Kobanê paşeroja me ye."
Berdevka Jinan a HDP'ê ya Stenbolê Aysûn Çeper jî da zanîn ku gelê Kobanê beden û îradeya xwe kir yek, bi rengekî wêrek li ber xwe da û hemû hêzên azadî û demokrasiyê yên li cîhanê bi rêzdarî bejna xwe li ber vê berxwedana Kurda ya Kobanê tewandin.
ENQERE
Desteya Rêveberiya Navendî ya HDP’ê bi boneya Roja Kobanê daxuyaniyek nivîskî da û got: “Berxwedana mezin a Kobanê li dijî tank û top û çekên giran ên DAIŞ’ê parastina axa xwe û welatê xwe kir. Vê berxwedana mezin bû hêviya gelên Rojhilata Navîn. Kobanê bû remza berxwedana mînak a cîhanê. Kobanê berxwedana vîna jiyanek hevpar û hemû cîhanê ye.”
RIHA
Rêxistina HDP’ê ya Rihayê jî li avahiy partiya xwe Roja Kobanê pîroz kir û êrîşên TSK’ê şermezar kir. Hevserokê HDP’a Rihayê Îbrahîm Halîl Akbaş destnîşan kir ku berxwedana li Kobanê hat nîşandan mîrasa nirxên mirovahiyê ye û êrîşên di arîfeya 1’ê Mijdarê de ya li dijî Kobanê manîdar in.
MELETIYÊ
Rêxistina HDP’ê ya Meletiyê jî di çarçoveya rojê de li avahiya xwe daxuyanî da. Rêveberên Komeleya Piştevaniyê û Çandê ya Pîr Sultan Abdal, ESP, ODP, DBP jî beşdarî daxuyaniyê bûn. Hevseroka HDP’a Meletiyê Perîhan Yucekaya got Kobanê nirxê hevpar a jinan û hêzên enternasyonalîst e û ji ber vê yekê divê hemû bindest xwedî li Kobanê derkevin.
WAN
Rêxistina HDP’ê ya Wanê jî bi wesîleya Roja Kobanê ya Cîhanê li Parka Dabbagoglu daxuyaniya çapemeniyê li dar xist. Balkêş bû ku polîsan derdora parkê dorpêç kir. Parlamentera HDP’ê ya Wanê Bedîa Ozgokçe û rêveberên HDP’ê û DBP’ê û gelek kes beşdar bûn. Rêveberê HDP’a Wanê Hasan Guven anî ziman ku gelê kurd ji bo nirxa mirovahiyê bedelên giran dan û berxwedana Kobanê hemû hêzên hov û feraseta wan têk bir.