Ji Malbatên Partîzan, Şehîd û Girtiyan (PŞTA) Îsmaîl Tepelî bertek nîşanî ferzkirina kincên yek tîpî da. Tepelî diyar kir ku bi ferzkirina cilên yek tîp re tê xwestin girtîgeh teslîm bigirin û wiha got: "Desthilatdaran tim ev yek kiriye. Bi Dadgehên Îstîklalê, DGM, Rewşên Awarte ev yek kirine. Ji ber vê desthilatdar niha kesên bi awayekî azad fikrên xwe tînin ziman digire. Qîma xwe bi girtina wan nayîne, niha jî hewl dide bi polîtîkayên çewisandin û tecrîdê wan bêdeng bike." Tepelî bi lêv kir ku divê malbat li dijî pêkanîna cilên yek tîp derkevin û xwedî li zarokên xwe derkevin. Her wiha Tepelî aşkera kir ku yên li derve jî divê dakevin kuçeyan û bertekên xwe nîşan bidin û divê her kes destê xwe têxe bin kevir. 

 

'YEK TÎPÎ TÊ WATEYA ŞER' 

 

Kifayet Yilmaz jî ku got hevjînê wê Selahattîn Yilmaz di girtîgehê de ye, anî ziman şik û gumanên wan hene û ev tişt gotin: "Em ferzkirina yektîpiyê wek şer dibînin û qethiyen em qebûl nakin. Ez li dijî şer im. Em naxwazin careke din êş û mirin ji girtîgehê derkevin. Hevjînê min dibêje qethiyen em ê li xwe nekin û divê derve jî vê yekê qebûl neke. Ez ê li pey doza hevjînê xwe bim." Yilmz got ji ber girtî xwedî li nasnameya xwe û aştiyê derketine hatine girtin û ew ê heta dawiyê li pişt wan bin. Yilmaz ferzkirina yektîpiyê wek mirinê pênase kir û wiha got: "Bedêla wê çi dibe bila bibe em ê li ber xwe bidin û bi ser bikevin." 

 

Mehmet Yaman jî ku got biraziyê wî Îbrahîm Halîl Yaman di girtîgehê de ye, diyar kir ku bi ferzkirina yektîpiyê re tenê ne yên di hundur de, yektîpîkirina yên derve jî tê xwestin. Yaman diyar kir ku niha li welat yektîpiyeke ku her kesî bêdeng kiriye heye û wiha got: "Qîma xwe bi çewisandin û polîtîkayên tecrîdî yên li girtîgê tenê nake û niha jî tê xwestin ku yektîpiyê têxin dewrê. Lê nikarin girtiyên me bêdeng bikin. Em jî li dijî yektpiyê ne. Em qebûl nakin û em vê ferzkirinê şermezar dikin."