ŞIRNEX - Malbatên Roboskê bertek nîşanî xistina wekîltiya Ferhat Encu dan û ev tişt got: "Encu wêneyê Roboskê yê li Meclisê bû. Nexwestin ev wêneya li ber çavê wan bimîne."
Piştî Dadgeha Edliyeya Herêmî ya Dîlokê di sala 2017'an de ceza li Parlamentgerê Partiya Demokratîk a Gelan (HDP) ê Şirnexê Ferhat Encu birî, wekîltiya wî xistin. Encu yê HDP'î di êrîşa balafirên şer ên Tirkiyeyê de de, di 28'ê Kanûna 2011'an de birayê xwe Serhat Encu û 19 xizmên xwe winda kiribû.
LÊGERÎNA EDALETÊ DEWAM KIRIN
Encu bi salan bû ji têkoşîna edaletê ya malbatên Roboskê re pêşengî dikir, doza der barê komkujiyê de hatibû vekirin, ji ber ku di hiqûqa navxweyî de tu encam bi dest nexist, serî li Dadgeha Mafên Mirovan a Ewropayê (DMME) dabû.
Encu her dem ji bo komkujî bê zelalkirin têkoşîn meşand û ji ber wê her dem kirin armanc. Bi îdiaya "Propagandaya rêxistinê kiriye" û "Ji derveyê qanûna îdarî ya bajêr tevgeriya ye" 4 sal û 7 meh 10 roj ceza lê birîn û ji 17'ê Sibata 2017'an ve li Girtîgeha Tîpa F a Kandirayê tê girtin.
Welatiyên Roboskê bertek nîşanê xistina wekîltiya Encu dan.
‘BIRYAR LI DIJÎ TÊKOŞÎNA ROBOSKÊ YE’
Serokê Roboskê-Derê ya bi KHK'ê hat girtin Velî Encu, biryara xistina wekîltiya Encu li dijî têkoşîna edaleta Roboskeyan dît û ev tişt anî ziman: "Gelê kurd û welatiyên Roboskê Ferhat Encu hilbijart. Di nezera me de wekîltiya Ferhat Encu nehatiye xistin. Dê malbatên Roboskê têkoşîna xwe ya edaletê bimeşînin."
'EMÊ XWEDÎ LI TÊKOŞÎNA EDALETÊ DERKEVIN'
Encu aşkera kir ku hêj faîlên komujiyê dernexistine holê û wiha pê de çû: "Bi xistina wekîltiyê re, xwestin komkujiyê di tarîtiya Enqereyê de bihêlin. Bi vê biryarê re bila li bendê nebin ku em dest ji têkoşîna xwe berdin. Ji bo komkujî bê ronîkirin emê têkoşîna xwe zêdetir bikin."
‘NEXWESTIN WÊNEYA ROBOSKÊ LI MECLISÊ BIBÎNIN’
Ji malbatan Hîkmet Alma jî diyar kir ku heta niha sozên ku dane wan neanîne cih.
Alma, anî ziman ku ji bo malbatên Roboskê têkoşîna edaletê li Meclisê dewam bikin, HDP'ê derfetrek daye wan û wiha dirêjî da axftina xwe: "Ji bo komujî bê ronîkirin Encu têkoşînek mezin da. Ji ber ku Encu wêneyê Roboskê yê li Meclisê bû, nexwestin bibînin. Encu wekîl û vîna me ye. Ne tenê vîna em, vîna hemû gelê Şirnexê ye."
MA / Ozgur Paksoy