Di çarçoveya lêpirsîna Serdozgerê Komarê yê Îzmîrê de li Îzmîr, Enqere, Stenbol û Balikesîrê operasyoneke hemwext pêk hat. Di nav de endamên sendîkayan, ekolojîst, Dayikên Aştiyê û siyasetmedar jî heyî gelek kes hatin binçavkirin.

 

Polîsan di serdagirtina malan de dest danîn ser kel û pelên eloktornîk û pirtûkan. Hat diyarkirin operasyon ji ber şahiyeke di sala 2014'an de pêk hatiye û kesên di bin çavan de bi "Endamtiya rêxistinê" tên sûcdarkirin.

 

HEJMARA KESÊN DI BINÇAVAN DE ZÊDE DIBE

 

Navê 28 kesên li Miduryeta Polîsan a Îzmîrê tên girtin wiha ne: Seroka Konseya Bajêr a Îzmîrê Kizbes Seyhan Aydin, endamê Meclisa Ekolojiyê yê HDK'ê Erol Akcan, endamên Meclisa Dayikên Aştiyê Behiye Yalçin, Hanîfe Polat û Melahat Kuş, rêveberê HDP'a Îzmîrê Mahsun Koç, Hevserokê HDP'a Bayrakliyê Îsmet Akbulak, rêveberê HDP'a Bucayê Teyfîk Boga Kaplan, endamê YAK-DER'ê Kerem Ay, endamê Komeleya Zilamên Olî yê Îzmîrê Ferzende Denîz, rêveberê DBP'ê Haydar Tekîn û endamên partiyê Dîlek Bakiş, Atiye Şahîn, Alî Îhsan Toprak, Bişar Ari, Mehmet Akdogan, Çetîn Çavdarci, rêveberê Navenda Giştî yê SYKP'ê Cavît Ugur û endamên HDP’ê Nurî Çîftçî, Mehmet Halîl Akgul, Melahat Kuçuk, Dunyamalî Arîç, Menderes Koçak, Îlhan Guçlu, Mehmet Ozturk, Fuat Gun, Rukiye Yilmaz û Ahmet Yavuz. 

 

Kesên li Balikesîrê hatin binçavkirin navên wan nehatin hînbûn, li Stenbolê Yildiz Çelîk û li Enqereyê jî endama MYK'ê ya KESK'ê Elîf Çuhadar, hat binçavkirin. Li gorî agahiyan dê Çuhadar bibin Îzmîrê. Di çarçoveya lêpirsînê de der barê hin kesên din de jî biryara binçavkirinê heye.

 

'VAN ZEXTAN BI DAWÎ BIKIN'

 

Wekîlê HDP'ê yê Îzmîrê Muslum Dogan, bertek nîşanê operasyonê da û xwest dawî li zextan bînin û demildest kesên binçavkirine serbest berdin. Dogan aşkera kir ku ev operasyon hewldanên astengkirin kongreya HDP'ê ya 11'ê Sibatê ye û got ku dixwazin berî kongreyê tirsê biafirînin, lê dê bi ser nekevin.