COLEMÊRG - Dema polîsan li Geverê avêtibû ser mala Necmettîn Fendîk û ew kuştibûn, Efrîna 14 mehî jî ji hemêza xwişka wê girtibûn û avêtibûn erdê. Di ser bûyerê re 6 meh derbas bûn, lê hîn jî Efrîna biçûk rihet nebûye.
Di 17'ê Tîrmeha 2017'an de polîsan li Taxa Gungorê ya Gevera Colemergê avêtibûn ser mala malbata Fendîk û Necmettîn Fendîk kuştibûn. Di dema avêtina ser malê de keça Fendîk Efrîna niha 14 mehî ye jî di hemêza xwişka xwe de bû û polîsan ew ji hemêza xwişka wê girtibû avêtibûn erdê. Piştî ku polîsan Efrînê avêt erdê nerihet bû û ji roja ku bûyer qewimiye heta niha malbatê 6 caran Efrînê rakiriye nexweşxaneyê. Dayik Kûdret Fendîk heta niha keça xwe 6 caran biriye nexweşxaneyên dewletê yên Geverê û Wanê. Dayik Fendîk diyar kir ku lê belê keça wê ranazê, derûniya wê nebaş e û ji ber xwarinê naxwe, her diçe zihîf dibe.
6 CARAN BIRIN BIJÎŞK, LÊ DÎSA JÎ BAŞ NEBÛYE
Dayik Fendîk diyar kir ku di ser bûyerê re 6 meh derbas bûne, lê tenduristiya Efrînê baş nabe û ev tişt gotin: "Di bûyera ku hevserê min hate qetilkirin de Efrîn ji hembêza xwişka wê girtin û ew li erdê xistin. Me wê 6 caran bire nexweşxaneyên Gever û Wanê. 4 Caran birin bijîşkê zarokan lê baş nebû. Herî dawî me 15 roj berê bir nexweşxaneyê. Bijîşkan got du serê wê de pirsgirêk tune ye, pirsgirêka wê derûnî ye. Me 2 caran jî bir cem derûnas. Lê wan jî tu tişt nekir. Ji me pirsa buyêrê kirin piştî ku me behsa bûyêrê kir paşve gav avêtin."
ZAROKÊN DI TEMENÊ WÊ DE 12 KÎLO NE EW 6 KÎLO YE
Dayik Fendîk destnîşan kir ku ji ber Efrîn li erdê xistin û bavê wê li ber serê wê hatiye kuştin, bi pirsgirêkên derûnî re rû bi rû ye û wiha domand: "Efrîn dema ku diçe cihê qelebalix û wêne yê bavê xwe dibîne bi girî dikeve. Ji ber vêya me wêneyên Necmettîn yê lo odeya ne rakirin. Bêsebeb digirî nan naxwe, ditirse. Efrîn niha 14 mehî ye û ji 8 kîloyan daketiye 6 kiloyan. Hevtemenên wê 12 kîlo ne. Niha pereyê me jî tune ye ku em bibin bijîşkên baş. Ji xwe pere yê me yê hebû jî dema ku hevserê min qetilkirin dizîn."
Her wiha dayîk Fendîk ji bo navê Efrîn jî axivi û wiha domand: "Navê Efrîn di kîmlîk de jî Efrîn e.
Necmettîn evîndarê şoreşa Rojava bû. Dema ku Efrîn ket destê kurdan wî jî got ku zarok were dinyayê em ê navê Efrîn lê bikin. Dema ku hate dinyayê jî me navê zaroka xwe Efrîn danî. Çavên zaroka min wek zeytûnên Efrînê ne. Ev çavên zeytûnî ji ber mirina bavê xwe dîtine tim digirîn."