Êrîşên Hêzên Çekdar ên Tirk (TSK) ên li ser Efrînê di roja 13’an de dewam dike û her ku diçe hêrsa li dijî van êrîşan mezin dibe. Şermezarkirina êrîşên li ser Efrînê li Şengalê didome. Piştî Meclîsên Gel a Şengalê û gundên wê îro Meclîsa Gel a navçeya Sînûnê jî bi daxuyaniya çapemeniyê şermezar kir. Endama Meclîsa Gel Helîma Şengalî daxuyanî xwend. 

 

Şengalî destnîşan kir ku ew ji bo Efrînê bang li raya giştî û sazîyên însanî yên cîhanê dikin û wiha got: “Îro êrîşên dewlata tirk ya dagirkar li ser Efrîn gund û warê wê dikave roja 13’an. Di van 13 rojan de gelek welatiyên me şehît ketin. Gelek gund gel ji ber bombebaranê hilweşiyan. Dîsa di encama van êrîşan de bi sedan cih û werê dîrokî kirin hedef. Xesarek mezin daye zindî û xwezayê Efrînê. Efrîn ji ber van êrîşan hovane di bin xetereyê de ye. Her roja diçe hejmara kuştiyan zêde dibe û bi taybet jî jin û zarok in.” 

 

‘WÊ EW JÎ WEK FÎREWNAN TÊK BIÇE’ 

 

Şengalî xwest têkildarî êrîşên ser Efrînê Amerîka, Rûsya û hêzên navnetewî yên cîhanê helwesta xwe zelal bikin û wiha got: “Pêwîste xwe li hember van êrîşan bêdeng nekin û ji nedîtî ve neyên. Em wek xelkê êzidî û Meclîsa Gel a Sînûnê van êrîşên Erdogan şermezar dikin. Em dibêjin dê Erdogan û pergala xwe jî dê wek bi dehan fîrewnan û Saadaman têk biçe û wekî dijminê gelan bikevî nav dîrokê.” 

 

Şengalî da zanîn ku ew heta dawiyê li pey xelkê Efrînê ne û dê nehêlin Efrîn bikeve.