Welatiyên navçeya Pirsûsê ya Rihayê, bi mehan ji êrîşên li dijî Kobanê re şahidî kirin, îro rojeva wan êrîşa li dijî Efrînê ye. Pirsûsî li hemberî polîtîkaya Tirkiyeyê bi bertek û hêrs in. Welatiyan aşkera kirin ku tu aliyê vê operasyonê yê rewa tune, ev êrîş li dijî tu rêxistinî nîne, li dijî destkeftiyên kurdan e.

 

'WELATIYÊN ALIYÊ SÎNOR BIRAYÊN ME NE' 

 

Bekîr Aslan bi salan e dikandariyê dike, diyar kir ku dê sibê çi bibe ne diyar e û wiha got: "Ev rewşa bi fikar ne tenê li vir, dema ez li medyayê mêze dikim, li her derî eynî ye." Aslan bertek nîşanî polîtîkaya Tirkiyeyê ya li dijî kurdan da û wiha axivî: "Birayên aliyê sînor ne bi tenê ne. Dibe ku felsefeya jiyanê cuda be. Dibe ku em taximên cuda bigirin. Ev nayê wê wateyê ku ew dijminê me ne."

 

'KUDERA KOBANÊ JI BO ME GEF E?'

 

Aslan got ku ew şer nasxwazin û wiha pê de çû: "Ji bo çi yên piştgiriyê nadin operasyonê dibin terorîst. Tu aliyê vî şerî yê mafdar tune. Yên mafdar dibînin, alîgirên dewletê ne." Aslan bal kişand ser Kobanê û aşkera kir ku heta niha tu êrîşek û gefek li dijî wan çênebûye, xewst bila yek morîstang jî jiyana xwe ji dest nede.

 

'HETA KU AKP HEBE DÊ TIŞTEK SERERAST NEBE' 

 

Bekîr Yildirim karê oto lastîkê dike, zimanê Erdogan gelekî şikestî dibîneû wiha axivî: "Dibêje 'lew hûn kî ne', dibêje 'alçax, bê terbiye...' Serokomarek vê yekê dibêje? Tu hêviyên me ji AKP'ê nemane. Di serî de pirsgirêka kurd, bê karî, heta ku AKP hebe, dê tu mesele çareser nebe." Yildirim destnîşan kir ku ev şerê li dijî kurdan e û wiha dirêjî da axaftina xwe: "Tu kes şer naxwaze. Ev fikra her kesî ye, lê kes newêre bîne ziman. Sînorekê vê tirsê jî heye."

 

'BILA TIRKIYE MESELEYA NAVXWEYÎ ÇARESER BIKE'

 

Muslum Çîftçî di qehwexaneyeke vala ya ku 3 kes lê ne, lîstikê dileyze, hêstên xwe wiha anîn ziman: "Di roja îro de kê fikrên xwe bîne ziman sûc tê dîtin. Divê Tirkiye berî Efrînê li meseleyên xwe yên navxweyî binhêre. Divê pirsgirêkên xwe yên navxweyî çareser bike. Bila bi nelêrêtî û bêkariyê re eleqedar be. Bila pirsgirêka xwe ya kurd çareser bike. Di navbera Efrîn û Kobanê, Amed û Pirsûsê de ferq nîne. Dema DAIŞ'ê êrîşê Kobanê kir, êrîşê cîranên wan dikirin çima ew qas ne hesas bûn. Ewlehî bi xeter nedidîtin?"

 

'MIN JI AKP’Ê ÎSTIFA KIR'

 

Welatiyê bi navê Ejder, nexwest paşnavê wî bê nivîsandin, aşkera kir ku wî berî mehekê ji serokatiya AKP'ê ya navçeyê Îstifa kiriye, xwest ji derveyê şer li çareseriyan bigerin. Ejder diyar kir ku jiyan herî bi qîmet, jiyana bi hev re ye.

 

'BILA KURD NEBIN ÇI BIBE BILA BIBE'

 

Lîstikvanê sêyemîn ê maseyê Îsmet Dede, derbirî ku di hilbijartinê de dengê xwe daye AKP'ê û ev tişt anî ziman: "Efrîn ku ye, Tirkiye ku ye?" Dede yê cotkariyê dike axaftina xwe wiha dewam kir: "Çi karê leşkerên tirk li Efrînê heye? Bila sînorê xwe biparêze. Ez qet baş li van bûyeran mêze nakim. Bila sînorê xwe biparêze bes e. Em êdî nikarin biçin Kobanê jî. Kê diçe nikare bê. Hişmendiya dewletê ewe, 'Bila kurd nebin xwedî tu tiştî.' Ev neyartiyek çawa ye?"

 

'JI BER PARVEKIRINEKÊ DIVÊ KES NEYÊ GIRTIN'

 

Abdullah Kaya di dikaneke piçûk de pêlavan difiroşe. Kaya aşkera kir ku dema ew televîzyonê temaşe dike derûniya wî xirab dibe û gelekî bi hêrs dibe û wiha got: "Mirov nikare xwe bigire. Di rojeva mirovan de tenê Efrîn heye. Em vî şerî niheq dibînin. Ji axa wan çi dixwazin. Mirov ji bo Kobanê derketin qadan. Niha bi tundî û zextan mirovan bêdeng dikin. Hêrs her ku diçe zêde dibe. Ev di kurdan de hêrsê zêde dike. Dê gelê kurd tu carî vê yekê ji bîr neke. Nivîskar û rewşenbîran piçûk dixin, yên dinvîsin û xêz dikin digirin, bijîşkan binçav dikin. Divê bila kes neaxive. Mirov neaxivin çareser dibe? Mirovên neaxivin dê çi bikin, qet wê difikirin? Niha her kes di nava xwe de qala Efrînê dike."

 

MA / Sedat Yilmaz - Arjîn Dîlek Oncel