EFRÎN – Gundiyên li ser sînorê Efrînê ku ji ber bombebarankirinê xwe li navenda Efrînê girtin, behsa zilma bi serê wan ve hatiye kirin û gotin ku mal û milkên wan hatiye desteserkirin û talankirin.
Şêniyên gundên li ser xeta sînorê Efrînê ji ber êrîşên dijwar ango bombeberankirinê barkirin û berê xwe dan navenda Efrînê. Gundiyên bar kirin li Efrînê bi cih bûn. Êrîşên Hêzên Çekdar ên Tirk (TSK) û komên girêdayî wan gundiyan neçar kirin ku dest ji axa xwe berdin û li bajêr bi cih bibin. Şêniyên gundan bertek nîşanî êrîşan dan û diyar kirin ku qada wan a jiyanê hatiye xespkirin û malên wan hatine talankirin.
Mistefa Îbrahîm ê 85 salî ji gundê Zehra yê girêdayî navçeya Bilbilê ya Efrînê ye. Îbrahîm da zanîn ku gundê wan li ser sînor bûye û sînorê Tirkiyeyê ji zeviyên wan pêk dihat.
Îbrahîm destnîşan kir ku sînorê di navbera Tirkiye û Sûriyeyê de ji ber dema derbasbûyî axa wan li aliyê din ê sînor maye û wiha got: “Niha jî dixwazin dest deynîn ser axa me ya li Efrînê. Me ji neçarî gundê xwe terikand. Ez gelek bi hêrs im. Bi balafiran gundê me bombebaran kirin. Bi dehan kes birîndar kirin. Sewalên me kuştin. Malên welatiyan talan dikin. Me zeviyên xwe çandibû û gelek darên me zeytûnan hene. Niha jî tên dest datînin ser wan. Ji bo êrîşî me bikin bi sedan darên zeytûnan tune kirin.”
'DEST DANÎN SER ZEVIYÊN ME’
Reşîd Mehmud ê ji gundê Hemamê yê navçeya Cindirêsê jî destnîşan kir ku gundê wan bi peymana Sykes-Pîcot ve dabeş bûye û wiha axivî: “Hêzên QSD’ê ji bo me biparêzin, me kişandin cihên bi ewle. Karê van koman ji berê ve diyar bû. Aşkere bû ku dê dest deynin ser mal û milkên xelkê. Mirovên me birîndar kirin û kuştin. Extiyarekî gundê me hebû wî kuştin. Ne hiştin em cenazeyê wî hildin. Ewil dîwar li ser sînor lê kirin. 400 darên me yê zeytûnan hebûn. Ji wan 200 daran birîn. Niha jî dixwazin tevahiya gundê me dagir bikin.”
'ME DI MALÊN ME DE BOMBE DIKIN’
Şemdîn Elo yê ji gundê Kurdo yê li ser sînor jî anî ziman ku ji destpêka şerê li Sûriyeyê Tirkiye wan aciz dike û ev tişt got: “Yên diçûn nav zeviyên xwe li wan dixistin. Niha jî me li malên me bombebaran dikin. Tirkiye ji bo kurdan bikuje, dîsa komên cîhadî dişîne ser axa me. Heta îro wan li Sûriyeyê ji bilî hilweşandina bajaran tu tiştek nekiriye. Wa bajarên din li ber çavan e. Niha jî dixwazin vî bajarî talan bikin. Hûn dibêjin azadî, lê wê demê çima hûn sivîlan qetil dikin?”
MA / Nazim Daştan