AMED - Der barê leşkerê ajokarê wesayîta zirxî Çawîşê Pispor S.K. yê li Liceyê Pakîze Hazara 85 salî eciqand û kuşt de, bi tawanbariya "Bi awayekî qisûrdar bûye sedema mirinê" doz hat vekirin. Di îdianameya hat amadekirin de hat xwestin ku Çawîşê Pispor S.K. di navbera 2 sal û 6 salan de bê cezakirin.
Li Licêya Amedê, di 14'ê Hezîrana 2017'an de dema Pakîze Hazara 85 salî ji bo meaşê xwe wergire diçû PTT'ê, li Kolana Mumîn Aga li ber avahiya PTT'ê wesayîta zirxî ya cendirmeyan lê qeliband û ew kuşt. Serdozgeriya Komarê ya Liceyê lêpirsîna der barê mirina Hazarê de temam kir û îdianame amade kir. Îdianame ji aliyê Dadgeha Cezayê Asliyeyê ya Liceyê ve hat qebûlkirin.
Di îdianameya yek rûpelî de ku têkildarî tawanbariyê paragrafek cih digire, bi tawanbariya "Bi awayekî qisûrdar bûye sedema mirinê" di navbera 2 û 6 salan de cezakirina Çawîşê Pispor S.K. yê ajokarê wezayîta zirxî yê bi awayekî negirtî tê darizandin hat xwestin.
Di îdianameyê de kurê Hazarê Veysî Hazar wek gilîdar cih girt. Di îdianameyê de tişta balê dikêşe ew e ku îfadeyên bersûc û şahidan, rapora pêzaniyê û raporên edlî cih negirtine.
Wê danişîna ewil a dozê di 14'ê Sobatê de li Dadgeha Cezayê Asliyeyê ya Liceyê pêk bê.