ÎZMÎR - Xizmên girtiyan destnîşan kirin ku ew ê li dijî ferzkirina yektîpiyê li ber xwe bidin û wiha gotin: "Ne em, ne jî zarokên me serî netewînin. Ger bivê em amade ne ku 24 saetan li ber deriyên girtîgehan rûnên."
Bertekên li dijî ferzkirina kincên yektîpî didomin. Xizmên girtiyan jî bertekên tund nîşanî vê ferzkirinê didin. Viyan Yildiz, dayika Leyla Yildiz a ku di Girtîgeha Jinan a Şakranê de ye, diyar kir ku ferzkirina yektîpî derî demokrasiyê ye û bi vê ferzkirinê re çewisandinên li girtîgehan zêdetir bûne. Yildiz ev tişt gotin: "Berê mehê carekê venêrîna rûtîn a li qawîşan hebû, lê niha heftane, rojane tê kirin. Her eşyayî desteser dikin. Name, wêne, rojname, radyoyên wan desteser kirine. Nikarin ji tu derî nûçeyan guhdar bikin û bixwînin. Ev tişt di 2 mehan de bûne. Ev bi temamî çeşneke îşkenceyê ne. Ji bo îşkenceyê serî li her cure riyê didin."
Yildiz, bi lêv kir ku ew li dijî ferzkirina yektîpî zarokên xwe destek dikin û daxwazên xwe yên ji bo demokrasiyê dubare kirin. Yildiz got ew naxwazin ev sepandin li tu deverê cîhanê jî bê sepandin û bi vê ferzkirinê re tepisandina girtiyan tê xwestin. Yildiz destnîşan kir ku li dijî vê ferzkirinê tekane rê têkoşîn e û ev tişt gotin: " Dixwazin îtaat bikin. Dixwazin bêjin 'em bêjin çi hûn ê wê bikin, hûn ê wan li xwe bikin, kes nikare bifikire.' Em ê jî li dijî vê li ber xwe bidin. Li dijî neheqiyê tekane rê têkoşîn e."
‘NE EM, NE JÎ ZAROKÊN ME EM Ê SERÎ NETEWÎNIN'
Abdulkadîr Aydin, kekê Yûsûf Aydinê di Girtîgeha Tîpa T a Jimare 2'yan a Şakranê de ye, ev tişt gotin: "100 salin tu tişt nemaye ku neanîne serî me. Girtî jî qebûl nakin, em jî qebûl nakin. Wê heta kuderê vê yekê ferz bikin? Dewlet dixwaze gelê kurd di bin destê wê de be û xizmeta wê bike. Me tim gotiye êdî bes e. Cîhan hay ji têkoşîna kurdan heye. Dizanin dê serî netewînin. Ne em, ne jî zarokên me serî natewînin. Bi salan e gundên me tên şewitandin, em ji warê xwe bûn. Dema mirov li dîrokê jî dinihêre, dibîne ku kurdan gelek caran hemêza xwe vekiriye. Çimkî me tu carî şer nexwestiye. Me tim aştî parastiye. Heta ku cîhan hebe em ê tim li dijî neheqî û derhuqûqiyê bitêkoşin. Em ê hem li hundur, hem li derve bitêkoşin û yektîpiyê biçirînin."
'DI 12'Ê ÎLONÊ DE JÎ BI SER NEKETIN'
Vasfî Ozer, kekê Agît Ozer ê di Girtîgeha Tîpa F a Jimare 2'yan a Kiriklarê de ye, bi lêv kir ku li dijî ferzkirina yektîpiyê helwesta girtiyan zelal e û wiha domand: "Qethiyen wê li xwe nekin. Dibêjin 'Em ê kefen li xwe bikin, lê yektîpiyê li xwe nakin.' Ji roja ku ferzkirina yektîpî derketiye heta niha dernayê hevdîtinê. Malbatên girtiyan jî li dijî yektîpiyê têdikoşin. Wê têkoşîna me berdewam bike. Ger bivê em amade ne ku 24 saetan li ber deriyên girtîgehan rûnên. Di 12'ê Îlonê de jî xwestin vê sepandinê bînin lê bi ser neketin. Wê niha jî bi ser nekevin. Çimkî çandeke me ya berxwedanê heye û wê nikaribin wê bişikînin."