AMED - Hevserokê HDP'ê yê Amedê Mehmet Şerîf Camci destnîşan kir ku wê ji Amedê girseyeke hêzdar tev li kongreya HDP'ê ya dê di 11'ê Sibatê de li Enqereyê bê lidarxistin bibe. Camci wiha got: "Wê kongre ji bo Tirkiyeya ku em hêvî dikin bibe gaveke girîng."
Wê HDP di 11'ê Sibatê de li Eywana Sporê ya Arena ya Enqereyê Kongreya Asayî ya 3'yemîn li dar bixe. Xebatên ji bo kongreyê bênavber didomin. Hevserokê HDP'ê yê Amedê Mehmet Şerîf Camci diyar kir ku hedefa wan ew e ku ew di navbera hezar û 500 û 2 hezar kesî ji Amedê tev li konreyê bibin. Camci destnîşan kir ku eleqeyeke zêde ya amediyan ji bo kongreyê heye.
'WÊ GEL LI DOR HDP'Ê BIBE XELEK'
Camci anî ziman ku di serdanên esnaf û malan de ew wê germahiya gel dibînin û li Amedê tevî ku atmosfereke giran a siyasî heye jî, ew ê xwe bigihînin wê hejmara ku wan ji xwe re wek hedef diyar kiriye. Camci bi lêv kir ku tevî çewisandinên siyasiyî, êrîşên li dijî Efrînê jî di rojeva gel de ye û wiha got: "Wê gelê me di vê çarçoveyê de bertekên xwe bînin ziman." Camci diyar kir ku li Tirkiyeyê ji aliyê AKP-MHP'ê û herî dawî jî bi beşdarbûyîna CHP'ê blokeke faşîzan hatiye avakirin û wiha domand: "Ev blok hewl dide ku perdeyeke reş bikişîne ser Tirkiyeyê. Lê belê HDP di pêvajoyeke wisa de wê gaveke ku vê blokê perçe bike bavêje. Di vê pêvajoya ku êrîşên li dijî gelê kurd gihaştine asta herî jor de, wê gel li dor HDP'ê bibe xelek û bi vî awayî bersivê bide."
'HDP HÊVIYA TIRKIYEYÊ YE'
Camci diyar kir ku ew li benda hemû kesên ku li hêla Komara Demokratîk in ku tev li kongreyê bibin û ev tişt gotin: "Wê çavê her kesî li vê kongreyê be. Wê HDP tevî hemû tarîtiyê jî, wê hêvî û ronahiya Tirkiyeyê be. Li hel hemû binçavkirin û girtinan jî wê HDP vê hewldana xwe bidomîne. Wê kongre ji bo Tirkiyeya ku em hêvî dikin bibe gaveke girîng." Camci diyar kir ku HDP li Tirkiyeyê alternatîfek e û di şert û mercên ku siyaseta demokratîk ji holê hatiye rakirin de wê HDP bi kongreya xwe bersiva bloka faşîzan bide.
Camci bertek nîşanî şewitandina avahiya HDP'ê ya Pendîkê da û wiha got: "Di pêvajoyeke wisa de îhtimala zêdebûna provakasyonên bi vî rengî zêde ye. Em hişyar dikin ku dê êrîşên bi vî rengî rewşên xeternak biafirînin. Ev êrîş li hemberî pêşeroja demokratîk a Tirkiyeyê ye. Wê nikaribin bi van êrîşan re xebatên me yên kongreyê asteng bikin."
Herî dawî Camci hemû gelê Amedê vexwand kongreya HDP'ê.