MÊRSÎN – Sumeyya Gok a li Girtîgeha Jinan a Tîpa T a Tarsûsê dimîne, diyar kir ku gardiyanan êrîşî wan kiriye û ew xistine hucreyê. Gok bi lêv kir ku gardiyanan ji wan re gotiye "Hûn terorîst in, em ê we li vir birizînin" û bi mirinê gef li wan xwarine.
Sumeyya Gok a li Girtîgeha Jinan a Tîpa T a Tarsûsê dimîne, bi riya telefonê bi malbata xwe re hevdîtin çê kir û binpêkirinên mafan ên li girtîgehê bi wan re rû bi rû dimînin ragihand. Her wiha malbatê di dema hevdîtinê de dengê Gokê tomar kir. Gok li qawîşa C-3'yan dimîne û derpêş kir ku piştî êrîşa li hemberî Efrînê gelek gardiyan hatine qawîşê, êrîşî girtiyan kirine û bi mirinê gef li wan xwarine.
GARDYAN: EM Ê WE LI VIR BIRIZÎNIN
Gok bi lêv kir ku li girtîgehê her diçe binpêkirinên mafan zêdetir dibin û ev tişt gotin: "Li vir rewşa me nebaş e. 30 an jî 35 gardiyan tevî sergardiyan û sermudur sibehê ji bo hejmariyê hatin qawîşan. Bêyî hejmariyê bikin gotin 'êrîş bikin, li wan bidin' û êrîşî me kirin. Ji me re gotin 'hûn terorîst in, em ê we li vir birizînin.' Hevalek me di serşokê de bû. Gotin 'em ê wê tazî bibînin.' Hevalên jin gotin 'dengê wê bes e, dengê wê bibihîsin, hejmariya xwe bikin û biçin.' Lê belê gardiyanan bi israr xwestin heval bibînin. Me jî got hûn nikarin tiştekî wisa bikin."
Gok diyar kir ku telefon bi zanebûnî tên girtin, daxwazname û giliyên sûcî naşînin derve û îdareya girtîgehê naxwaze tiştên li hundur diqewimin derve bi wan bihese. Gok ev tişt gotin: "Bi mirinê gef li me xwarin. Biçin bi çapemeniyê re parve bikin. Em derb kirin. Li min, Nazli Songul, Gulîstan Oztekîn û hevaleke me ya bi navê Garîp xistin û em xistin hucreyan. Niha ji bo me doza cezayê hucreyê dikin. Dixwazin me bibin hucreyan û li wir me bikujin."
‘LI HER DERÊ MIN ŞOPA NENÛKAN, POSTALAN Û MORAYÎ HEYE'
Gok, bi lêv kir ku wan rapora derbkirinê wergirtiye, lê belê der barê gardiyanên hatine derbkirin de tu kirarî nehatine kirin û wiha domand: "Bi ser de jî ceza li me birîn. Du rojin di nav nivînan de me. Li ser ruyê min, li ber çavê min û li her derê min morayî hene. Li ber çavê mudurên girtîgehê û sergardiyanan li me dan û bi lingê tazî em birin hucreyan. Ji me re gotin 'Ev der Tarsûs e, êdî em ê dilopek av jî nedin we.' Li qawîşên 10 kesî, 20-25 kes dimînin. Dema em doza mafê xwe dikin, ava germ nadin me. Xweşikî nan nadin me. Hîn nû nû têm ser hişê xwe. Hevalên min ez dibirim lawaboyê û tanîn. Taqet di min de nemabû rabim ser piya. Hevalên min ez dibirim xwarinê. Li her derê min şûna şopên nenûkên gardiyanan û postalên wan hene. Mudur van mirovan diparêze û xwe li bêdengiyê datîne."
Gok destnîşan kir ku wan gilî kiriye û wiha bang kir: "Em li vir gilî dikin, daxwaznameyan dinivîsin lê belê naşînin derve. Em ê ji parlementeran, Meclîsê, ÎHD'ê re daxwaznameyan binivîsin. Em ê gilî bikin. Em ê ji komîsyona şopandinê ya girtîgehê re binivîsînin. Ev hemû piştî operasyona Efrînê rû dan. Ji kerema xwe dengê me bibihîzin."