*Xebatkar û bernamevanê TV10 a bi KHK'ê hat girtin Huseyin Kelleci, bertek nîşanî girtina xebatkarên televîzyonê da û wiha got: "Ew çi qas dengê elewiyan bitepisînin û bigirin jî, em ê tim dengê xwe bilind bikin." 

 

*Kovara Jîneolojiyê di hejmara xwe ya 8'an de "Jiyana wekhev a azad" nîqaş dike. 

 

*Endamê Komîsyona Şopandina Girtîgehan a Baroya Amedê Parêzer Onder Alçîçek, diyar kir ku di dema 12'ê Îlonê de li Girtîgeha Amedê girtî li hemberî ferzkirina kincên yektîpî berxwedaneke mezin nîşan dabûn û balkêş e ku niha jî ewil kincên yektîpî anîn Girtîgeha Amedê. 

 

*Kocaeliyan bertek nîşanî êrîşên li dijî Efrînê dan. Kocaeliyan destnîşan kir ku serketina li Rojavayê bi dest ketiye îktîdar wê hezm nake û wiha gotin: "Efrîn ji bo me meseleya rûmetê ye. Divê em ji bo rûmeta xwe bitêkoşin." 

 

*Hevşaredarên DBP'î yên bi KHK'yan qeyûm tayînî şûna wan hatin kirin, ji aliyê Wezareta Karên Hundurîn cara 10'emîn ji peywirê hatin dûrxistin. 

 

* Hikûmeta AKP'ê ku bi polîtîkayên şer xwe li ser piyan dihêye, ji bo çavkaniyê ji şer re ava bike çav berdide pereyê welatiyan. Hikûmetê piştî benzîn û sotemenî û gelek amûrên malê zem kir, niha çav berda lîstikên şensê. Balkêş e Diyanetê beriya sersalê gotibû 'Lîstika şensê heram e." 

 

*Şîrketa Etî Bakirê ya ji bo li gundê Şemika yê Şemrexa Mêrdînê fosfatê derxîne, koçberiyê li gundiyan ferz dike ji bo tesîsan milyar dolarek budçeyek veqtandibû û niha hewl dide qada tesîsan berfirehtir bike. Ji bo tesîsan cihê qereqola li gund hat guherandin. Têkoşîna gundiyên bi gefan re rû bi rû mane didome. 

 

*Ekolojîstan bertek nîşanî êrîşên Artêşa Tirk ên li ser Efrînê dan û diyar kirin ku şer di heman demê de ekolojiyê jî wêran dike û divê em bi cesaret aştiyê biparêzin.

 

*Parêzerên Baroya Îzmîirê bal kişandin ser kesên li dijî şer derdikevin û tên binçavkirin û aşkera kirin ku parastina aştiyê mafek e û xwestin kes ji daxwaza aştiyê netirse.

 

* Saziyen Sîvîl a Aştîxwaz, dê ji bo operasyona li dijî Efrîn li avahiya ÎHD'ê ya Stenbolê civîna capemeniyê li dar bixe. (11.00)

 

* Platforma Li Dijî Cilên Yek Tîp a li dijî ferzkirina cilên yek tîp civiyan, dê li Hotela Hîll a Taksîmê deklarasyona xwe ya sazîbûnê aşkera bike. (12.00)

 

* Şaxa SES'ê ya Stenbolê bi dirûşma "Xebatkarên Tenduristiyê xwedî li aştiyê derdikevin, ji şer re na" dê li Şaxa SES'ê ya Şîşliyê civîna çapemeniyê li dar bixin. (12.30)

 

* Baroya Amedê dê di hefteya 111'an de li ber Edliyeya Amedê ji bo Tahîr Elçî edaletê bixwaze. (13.30)

 

* Çalakiya "Em karê xwe şûnve dixwazin" 433 roj e li Kolana Yukselê ya Enqereyê dewam dike. (13.30/18.00)

 

* Platforma Şaxan a KESK'ê ya Enqereyê dê li dijî operasyona Efrînê li Navenda Giştî ya SES'ê daxuyaniyê bidin çapemeniyê. (11.00)