AMED - Înîsiyatifa Rojnamegerên Azad (ÎRA), têkildarî helwesta hikûmetê ya li dijî çapemeniyê û zextên dawî yên li ser çapemeniyê daxuyanî da û got: "Em qebûl nakin ku hikumet wekî leşkeran nêzî çapemeniyê bibe û fermanê bide wan. Divê bi lezgîn polîtîkaya li ser çapemeniyê bi dawî bibe."
Înîsiyaitfa Rojnamegerên Azad, têkildarî binçavkirina rojnamegeran û helwesta hikûmetê ya li dijî çapemeniyê bi daxuyaniyekê şermezar kir û xwest hikûmet êdî dest ji fermandayîna li ser çapemeniye berde. ÎRA di daxuyaniye de anî ziman ku di rojên dawî de rojnamegerî di nava şert û mercên gelek zahmet de tê kirin û wiha got: "Di rewşa OHAL'ê de azadiya mafan hatiye tunekirin. Hikûmet rexneyek herî biçûk tehamûl nake. Hunermend, siyasetmedar û rojnamegerên ku ji ber fikrên xwe û karên xwe tên girtin. Rejima ku bi zextan xwe li ser piyan dihêle her ku diçe bêtir van zextan kûrtir dike.
Herî dawî piştî operasyona Efrînê hikûmeta AKP'ê ku medya xistiye kontrola xwe dîsa bi wan re civîn çêkir û ferman da wan. Piştî operasyonê Serokwezîr Binali Yildirim di 21'ê Çile de bi nûnerên medya re civîn çêkir û ferman da wan. Gef li wan xwar û diyar kirin ku yên li gorî pêşniyar û daxwazên wan weşanê bikin. Bi awayekî aşkere ferman da û gef xwar.
Rojnameger, ji agahiyên rast berpirsiyar in û xwedî rolin ku civakê rast agahdar bikin. Fermana ku rojnamegeran dike wekî qûl û leşkerên xwe nayê qebûlkirin. Dixwazin bi tirsê civakê dîl bigirin û ji bo vê yekê gefan li çamemeniyê dixwin. Dixwazin çapemenî li gorî wan manşetên xwe diyar bike. Çapemeniya ku li gorî fermana wan manşetan diyar dike jî bûye şirîkê vî şerî. Rojnamegerên li djî vê yekê derdikevin û rastiyan dinivîsin û xêz dikin jî tên binçavkirin. Heri dawî Editorê Kovara Rojnameya Demokratik Modernite Haydar Ergul û Nûçegîhana Ajansa Mezopotamya Seda Taşkin, hatin binçavkirin û girtin.
Dîsa ji ber parvekirinên medya civakî Sibel Hurtaş, Hayri Demîr, Îshak Karakaş û Nurcan Baysal hatin binçavkirin û hêj di bin çavan dene.
Divê berî her tiştî bê zanîn ku çapemenî ne beşek ji operasyonê ye. Divê çapemenî heq, hiqûq azadiya mafên mirovan biparêze û xizmeta aştî û demokrasiyê bike. Divê rastî û geşedanan wekî objektif bi civakê û raya gişti re parve bike. Hemû polîtîka û tundiyên li dijî medya muxalif nayê qebûl kirin.
Helwesta dewlet û hikûmetên xwedî vê helwestê bi tu awayî nayê qebûlkirin. Em vê yekê qebûl nakin û bi tundî şermezar dikin. Em dixwazin hemû rojnamegerên ji ber parvekirinên medya civakî û nûçeyên xwe hatin binçavkirin û girtin tev bên berdan û textên li ser çapemeniya muxalif bi dawî bibin. Em bang li hikûmetê dikin ku dawî li van polîtikayan bînin."