Wekîlên Partiya Demokratîk a Gelan (HDP) ên Wanê Adem Geverî, Lezgîn Botan û Bedîa Ozgokçe Ertan bertek nîşanê êrîşên Tirkiyeyê yên li dijî Efrînê dan û dan zanîn ku ev êrîşa li dijî biratiya gelan pêk tê.

 

Geverî diyar kir ku demek dirêj e amadekariya êrîşa li dijî Efrînê dikin, piştî Ezaz û Cerablûsê teslîmê Artêşa Azad a Sûriyeyê (OSO) kirine ev pêvajo dest pê kiriye. Geverî aşkera kir ku di şerê 7 salan ê li Sûriyeyê de, tenê li Efrînê şer neqewimî ye û wiha got: "Ji bo Erdogan di hilbijatinên 2019'an de bi ser keve, tenê di destê wî de şer maye. Ji 7'ê Hezîranê vir li Bakurê Kurdistanê, piştre referanduma Başûrê Kurdistanê û îro jî polîtîkaya Rojava û Efrînê di dewrê de ye."

 

‘DEEWLETA TIRK NE SAMÎMÎ YE’

 

Geverî da zanîn dewleta tirk ne samîmî ye. Hekesamîmî bûya dê rejîma Esad a ku 7 sal e ne rewa dibîn, dê rewa nedîta û wiha pê de çû: "Berê Esad wekî dijmin didît, ji bo kurd li ser axa xwe nebin xwedî vîn, bi Esad re hevkarî danî. Ev peymaneke qirêj û veşarî ye. Mixabin duh DYA'yê çavê xwe ji operasyona Başûr re girt û îro jî Rûsya wê yekê dike." Geverî êrîşa li dijî Efrînê wekî "dagirkerî" pênase kir û ev nirxandin kir: "Berxwedana Konbamê, berxwedana herî mezin a li dijî çeteyên herî qirêj ên cîhanê bû. Ev têkoşîna gel û têkoşîna axê bû. Ruxmê her tiştî bi ser ket. Ev şer tenê ne li dijî têkoşîna kurdan e, di heman demê de êrîşke dagirkeriya axa Sûriyeyê ye."

 

'7 SAL E WEKÎ BAJARÊ AŞTIYÊ YE'

 

Lezgîn Botan destnîşan kir ku di 7 salên şerê li Sûriyeyê de, Efrîn wekî bajarê bê şer û aştiyê derket pêş û wiha axivî: "Ji 10 qatî nifûsa ji dervebê Efrînê, li bajarên wekî Heleb, Hama û Idlibê hatine. Erebên ji şer revîne, tirkmen û genên cuda li Efrînê bi cih bûne û di nava aramiyê de dijîn. Ji ber wê Efrîn de bajarekî ji 100 hezar kesî ye. Îro qasî milyonek mirov lê dijîn. Beyî ku piştgiriya cîhanê û Neteweyên Yekbûyî (BM) bigire, bi hêz û keda xwe li ser piyan dimîne. Efrîn ji bo 82 milyon welatiyên li Tirkiyeyê ne gefek e."

 

‘TOLA DAIŞ'Ê JI KURDAN DIGIRIN’

 

Botan anî ziman ku ne tenê sînorên Tirkiyeyê, şebekeyeke dizan a ku hemû parzemîn derbas kirî derketiye bolê û ev nirxandin kir: "Di serî de Serokê Giştî yê AKP'ê û hemû wezîrên wê, navê wan di nelêrêtiyê re derbas dibe. Ev operasyon li ser van hemû bûyeran girt. Bi MHP, Ergenekon û hemû hêzên din re ji bo hilbijartina 2019'an amadekariyê dike. Ciwanê kurd, tirk, Anatolya Navîn û hemû zarokên xizanan dike qurbanê vî şerî. Bi vê operasyona li dijî Efrînê re, di heman demê de tola DAIŞ'ê ji kurdan digirin."

 

TIRKIYE HIQÛQA NAVNETEWEYÎ BINPÊ DIKE

 

Wekîla HDP'ê Bedîa Ozgokçe Ertan jî diyar kir ku ew wekî partî bi mehan in Tirkiyeyê hişyar dikin û ev nirxandin kir: "Li wir kurd, elewî û ereb hene. Ji ber şerê li herêmê nifûsa Efrînê gelekî zêde bûye. Beyî ku li dijî Tirkiyeyê gefek hebe, Tirkiyeyê li dijî Efrînê şer da destpêkirin, ev li dijî hiqûqa navneteweyî ye. Diyar e desthilatdarî li pişt vê delodîniyê ye. Dixwazin Tirkiyeyê tev li vê bikin. Divê dostên kurdan, her kesên alîgirên demokrasî û aştiyê li dijî vî şerî derkevin."

 

MA / Nîmet Olmez - Mujdat Can