MÊRDÎN - Hevberdevkvê KÎD'ê yê Mêrdînê Fahrî Dogan, bertek nîşanî êrîşên li hemberî goristan û cenazeyan da û bal kişand ser hedîsa Hz. Pêxember a “Kî dibe bila bibe, ger rêz û hurmetê nîşanî cenazeyan nede, ji misilmantiyê derketiye.”
Hevberdevkê Kongreya Îslama Demokratîk (DÎK) a Mêrdînê Fahrî Dogan, bertek nîşanî hilweşandinên goristanên YPG û YPS’ê yên li Bedlîs û Mûşê dan û wiha axivî: “Di dîroka tu olê de hilweşandina goran tune ye. Gor ên kê dibin bila bibin, divê rêz û hurmet jê re bê dayîn. Di ola îslamê de êrîşkirina cenazeyan û hilweşanindina goran guneh û qedexe ye. Hemû kesê ku dimire, dibin axê de mêvanê Xwedê ne. Ên ku mêhvanên Xwedê nerihet bikin, dê Xwedê jî nerehet bikin.”
'ÊN KU RÊZ NÎŞANÎ CENAZEYAN NEDE JI MISILMANTIYÊ DERKETIYE’
Dogan, behsa nêzîkatiyek Hz. Pêxember a li hemberî goristanan kir û wiha got: “Rojekê pexemberê me li ber dîwarekê bi eshabeyên xwe re rûdinê. Di rêde cenazeyek derbas dibe. Pêxember demildest radibe ser piyan, cil û bergê xwe sererast dike û rêzê nîşanî cenaze dide. Di wê navberê de eshabieek wî jê re dibêje, ‘ev cenaze ne yê misilmana ye, cenazeyê muşrîkekê ye.’ Vê yekê dizane û dibêje ‘Kî dibe bila bibe, yên ku rêz û hurmetê nîşanî cenazeyan nede ji misilmantiyê derketiye.’ Ev mînakek pir berbiçav e.”
'JI DÎROKÊ HEYA ROJA ÎRO GORISTIN NEHATINE HILWEŞANDIN’
Dogan, da zanîn ku di hemû olî de li hemberî cenazeyan bêrêzî tune ye û wiha bilêv kir: “Hilweşandina goran qedexe ye. Ji dîrokê, heya roja îro tu car gor nehatine xerabkirin û wêrankirin. Di serdema Selçukiyan, Osmaniya û Bîzansan de jî rewşeke wisa xwe nedaye der. Di dîrokê de li ser vê erdnîgeriyê gelek şer û mirin çê bûn. Lê tu carî bêrêzî li dijî goran nehatiye kirin û gor nehatine xerabkirin.”
Dogan, destnîşan kir ku mirovên îmana wan lewazbûyî, baweriya wan kêmbûyî û ji dilovaniyê dûr ketene ancex hovîtiyeke wiha bikin û wiha dawî li axaftina xwe anî: “Divê hemû kesên bawermend li dijî vê hovîtiyê bêdeng nemînin. Ji ber tirsa di civakê de hatî avakirin hinek mirov nikarin dengên xwe derxînin. Di mijarek wiha de jî dixwazin civakê ji hev cuda bikin. Cenazeyên mirovên vê axê, zarok û xizmên em bi awayekî hovane ji gorên wan derxistin. Hilweşandinên goran ji ber lewazbûna îmanê ye. Hemû kesên behsa misilmantiyê û mirovahiyê dikin, divê xwedî li goristanan derbikevin û li dijî hovîtiya heyî bêdeng nemîn n.”