Ciwanê 19 salî Murat Araç li navçeya Gazîpaşaya Antalyayê di 15'ê Kanûnê de bi hinceta li ser wî nasnameya sexte derketiye, cendirmeyan ew binçav kiribûn û teslîmê miduryeta polîsan kiribûn. Piştre hat îdiakirin ku Araç xwe di qata 3'yemîn de avîtiye û dawî li jiyana xwe aniye. Lê hat îdîakirin ku Araç xwe neavêtiye û hatiye avêtin. Piştî mehek di ser bûyerê der derbas bû, Dadgeha Cezayê Sûlhê der barê dosyaya lêpirsînê de biryara "Nepenî" da. Parêzerê malbatê Prz. Hadî Cîn yê xwest rapora Saziya Tipa Edlî û rapora otopsiyê bistîne, Dozgerê Komarê yê Gazipaşa got "Bi daxwaza 'Biryara Nepenî' dosya şandiye Dadgeha Cezayê Sûlhê û dadgehê jî biryara "Nepenî" daye. 

 

Prz. Cîn, diyar kir ku wan xwestiye ji bilî raporê belgeyên kamera, wêne, bêtêlê jî li dosyayê zêde bikin, lê ji ber ku der barê dosyayê de biryara "Nepenî" hatiye dayîn nikarin xwe bigînin naveroka dosyayê. Cîn wiha got: "Der barê dosyayê de di demên dawî de biryara "Nepenî" hat girtin. Piştî em çûn dosyayê bibînin Dadgeha Cezayê Sûlhê ev biryar stend. Çima ji zelaliyê direvin û çima dosyayê digirin. Di nava vî karî de karekî din heye. Ger ku der barê dosyayê de biryara veşartinê hebe şik jî zêde dibin." 

 

ŞIKAN ZÊDETIR DIKE

 

Cîn, destnîşan kir ku ger dozger bawerî bi biryara Nepeniyê anîbûya dê ji destpêkê de anîbûya û wiha got: "Piştî me xwest agahiyê li dosyayê zêde bikin biryara Nepeniyê hat girtin. Em difikirin ku ferman hatiye dayîn û piştre ev biryar hatiye dayîn. Em bawer dikin ku pêdivî bi vê biryarê tune ye. Dê bi vê biryarê çi veşêrin. Ev bêtir şikê dixe nava dosyayê." 

 

Prz. Cîn, da zanin ku di paropa Saziya Tipa Edli de şik hene û wiha got: "Murat li ser serê xwe ketiye. Mirovek ji bo întîharê xwe serserî davêje? Gelek şikên ku bên ronîkirin hene."

 

RAPOR KÊM E

 

Cin, anî ziman ku rapora hatiye dayîn kêm e û wiha bi dawî kir: "Birîn û şopên ji ber ketina xwar divê ne wisa bin. Birîn û şopên li destê wî çê bûn çawa û kengî çê bûn. Divê ev bên ronîkirin. Raporek kêm e. Divê berfirehî bê l^kolînkirin." 

 

MA / Berivan Altan