ŞIRNAK – Dozger der barê mirina pidikê 35 rojî Muhammed Tahir ê li Cizîrê jiyana xwe ji dest da de hewce bi lêpirsînê nedît. Parêzeran malbatê ev yek îtiraz kir. Lê heyeta dadgehê dozger mafdar dît û îtîraza parêzerên malbatê red kir.
Serdozgeriya Komarê ya Cizîrê, di lêpirsîna der barê mirina Muhammed Tahir Yaramûş ê 35 rojî ku wextê qedexeya derketina derve ya di navbera 4-12'ê Îlona 2015'an de li Cizîra Şirnexê hat îlankirin de jiyana xwe ji dest dabû, biryara neşopandinê dabû. Derketibû holê ku di çarçoveya lêpirsînê de bi sifetê "gumanbar" îfadeya dayik Sosin Yaramûşê jî hatiye girtin.
PARÊZERAN ÎTİRAZ KIR
Piştî biryarê parêzerên girêdayî Platforma Hiqûqnasên Azadîxwaz (OHP) bi gotinên “Hêzên ewlehiyê yên destûr nedabû mudaxale bê kirin, personelên ambûlansê û kesên bingeha qedexeya derketina kolanan ava kir sedema mirina Muhammede Tahir Yaramûş e” îtirazê Dadgeriya Sulh Cezayê kirin.
DADGERIYÊ BIRYAR DI CIH DE DÎT!
Dadgeriyê jî piştî demekê îtiraza parêzeran ret kir û biryara xwe bi kesên têkildar re parve kir. Dadgeriyê di biryara xwe de biryara dozgeriyê bi bîr xîst û destnîşan kir ku biryara neşopandinê di cih de hatiye girtin. Di biryara dadgeriyê de ev tişt hatin gotin: “…Ev biryar di encama lêkolînê de hat dîtin ku di cih de ye, ji bilî vê dadgeriya me tu lêkolînan nikare bike, muştekî dikarin ji bo kesên wek sucdar dibîne giliyên xwe li dozgeriyê bike…”
ÇI BÛBÛ?
Wextê qedexeya derketina derve ya 8 rojan a li Cizîrê, Selman Agar (10), Sait Cagdavul (19), Osman Çaglı (18), Cemile Çagirga (13), Ozgur Taşkin (20), Meryem Sune (53), Maşallah Edin (35), Zeynep Taşkin (18), Bunyamin İrci (15), Sait Nayci (17), Mehmet Erdogan (75), Eşref Erdin (60), Şahin Açik (75), Muhammed Tahir Yaramuş (35 rojî), Mehmet Emin Levent (21) û Suphi Saral (50) jiyana xwe ji dest dabûn. Wextê qedexeyê destûr nehatibû dayîn ku cenaze werin veşartin.
Cenazeyê Yaramûş 2 rojan li mizgefta taxê hatibû rawestandin û paşê li ser hewldanên parlementerên HDP'ê ji mizgeftê hatibû wergirtin û radestî ambulansê hatibû kirin. Her 16 cenaze piştî bidawîbûna qedexeyê ji aliyê bi deh hezaran kesî ve hatibû definkirin.
Dozgeriyê derbarê lêpirsîna mirina Yaramûş de destnîşan kiribû ku ambûlans ji ber pevçûnan nekarinê biçin cihê bûyerê û mudaxale bikin. Bav Abdullah Yaramûş jî ragihandibû ku wan piştî pitika wan ketiye erdê ambûlans geriyane lê kom nehatine. Bav Yaramûş gotibû ku hêzên ewlehiyê destûra hatina komên ambûlansê jî nedane.
MA - Gokhan Altay