Xebatkarê Rojnameya Ozgur Gundemê Orhan Karaagar, 25 sal berê di 19'ê Çileya 1993'an de li Kolanên Cumhuriyetê nêzî kuçeya 2'ê Nîsanê ya Wanê dema diçû malê hat kuştin. Karaagar, di serdema darbeya 12'ê Îlonê de 2 sal û nîvan li Girtîgeha Amedê hat girtin. Piştî hat berdan di rêveberiya Komeleya Mafên Mirovan a Wanê de cih girt. Di sala 1991'an de dest bi xebat û belavkirina Rojnameya Ozgur Gundemê kir. Di ser kuştina Karaagar re 25 sal derbas bûn, lê hêj kujerê Karaagar nehatiye dîtin û nehatiye darizandin. Hevsera Karaagar Sinem Karaagar û xwişka Karaagar Şengul Aci, qala jiyan û têkoşîna Orhan kirin. 

 

TEVÎ HEMÛ GEFÊN KUŞTINÊ JÎ ROJNAME BELAV KIRIN

 

Hevsera Orhan Karaagar Sinem Karaagar diyar kir ku rastî gelek zext û tundiyan hat û tevî hemû zextan dîsa jî rojname belav dikir û wiha got: "Ji ber ku rojname belav dikir hat kuştin. Ji belavkariya rojnameyê pir hez dikir. Dema rojname belav dikir her dem gef lê dihatin xwarin û di bin zextan de bû. Beriya ku bê kuştin 3 caran hat binçavkirin. Polisan xwest rojnameyê berde. Gefa 'Rjnameyê berde' li wî xwarin. Lê wî jî got: ‘Heta ez hebim ez dê rojnameyê bifiroşim. Ez bêm kuştin jî ez dê vê rojnameyê bigihînim gel. Heta hat kuştin jî rojname belav kir." 

 

'EZ DÊ LI PIŞT FIKRÊN XWE BIM'

 

Karaagar, anî ziman ku piştî hevserê wê Orhan hat kuştin, ji bo kujer bên dîtin û darizandin serî li hemû rayedaran dan, lê 25 sal derbas bûn hêj kujer nehatine dîtin û darizandin. Sînem Karaagar, da zanîn ku ew dê heta dawî şopdarê doza Orhan bin û wiha got: "Ji bo kujer bên dîtin û darizandin em ê têkoşîna xwe berdewam bikin. Heta em bimirin em dê şopdarên doz û fikrên wî bin. 25 sal berê zext li ser rojnamegeran hebûn niha jî zext hene." 

 

‘BI MAZLUM DOGAN RE GIRTÎ MA'

 

Xwişka Orhan Karaagar Şengul Aci jî diyar kir ku dema li Colemêrgê karê makinistiyê dikir di sala 1980'an de dema hat Wanê polîs hatin mala wan û xwestin Orhan bi xwe re bibin, lê dayika wî destûr nedaye polîsan û polîs bi zorê ew birine û pişt re hat girtin û şandin Girtîgeha Amedê. Şengul, Aci, da zanîn ku piştî Orhan 2 sal û nîvan li Girtîgeha Amedê ma hat berdan û wiha got: "Orhan di serdema Mazlum Dogan de girtîbû. Dema Orhan hat berdan dîrek ew şandin leşkeriyê. Piştî ji leşkeriyê hat zewicî. Pişt re dest bi belavkariya Rojnameyê kir." 

 

'EZ NEKIM EW NEKE DÊ KÎ BIKE? 

 

Aci, da zanîn dema Orhan belavkarî dikir rastî gefên polîsan ên "Em dê te bikujin" dihat û wiha got: "Şevekê hat mal bêhn lê çikiya bû. Dayika min got 'Kurê min çi bû?' Wî jî got '3 kes li pey min in' Dayika min jî got her tişt destê wan de ye. Wê te bikujin. Dest ji rojnameyê berde. Wî ji got 'Dayê ez belav nekim, ew belav neke dê kî belav bike? Xwîna min ji ya kê sortir e? Ez zanim dê min bikujin, lê dîsa ez ê vê rojnameyê belav bikim.'"

 

‘PEREYÊ ROJNAMEYEKÊ NE HÊSAN E'

 

Aci, anî ziman ku carekê ji Orhan kovarek stend û pereyê wê neda û wiha got: "Dema hat malê got 'Min kovarek dabû te. Te pereyê wê nedaye. Min jî got kovara te daye 1-2 TL ye. Ez nedim dê çi bibe? Wî jî got 'Tu nede yê din nede nabe. Tu bêje qîmet tune yê din bêje nabe. Pereyê kovar û rojnameyekê ne hêsan e. Dibe ji bo we hêsan be, lê ji bo min ne hêsan e.'"" 

 

BI DEH HEZARAN MIROV LI NEXWEŞXANEYÊ KOM BÛN

 

Aci, anî ziman ku roja Orhan bê kuştin nedixwest dest ji wî berde û wiha got: "Orhan roja Qendîla Beratê hat qetilkirin. Çawa me bihîst em pêxwas derketin kolanê û ketin şopa wî. Em çûn nexweşxaneyê û heta sibê li nexweşxaneyê man. Piştî Orhan hat kuştin, ji Colemêrg, Amed, Bedlîs, Agiriyê mirov hatin. Nêzî 10 hezar mirov li ber nexweşxaneyê kom bûn. Gora ku me Orhan lê defin kir bûbû wekî qiyametê."

 

Aci, da zanîn ku ji wê demê heta niha 25 sal hatin guhertin, lê di hişmendiya rayedaran de tiştek nehatiye guhertin û wiha got: "Wê demê dewletê înkar kir. Lê JİTEM hebû. Endamê JÎTEM'ê Murat Demir û Murat İpek piştre daxuyanî dan. Du îtîrafkar di bin parastina dewletê de bûn. Kurd di pêvajoyeke gelekî dijwar re derbas bûn. Rojname hat bombe kirin. Rojnameger şehît ketin. Ji roja Orhan hatiye kuştin heta niha tiştek nehatiye guhertin. Dîsa zext û tundiyên i ser rojnamegeran berdewam dikin." 

 

MA / Mujdat Can