DERSIM - Nivîskar Mesût Ozcan destnîşan kir ku qeyûm hewl dide elewiyên Dersimê bikin sûnnî û pîrên li cemxaneyan jî ji aliyê van kesan ve tên fînansekirin.
Li herêmê polîtîkayên çewisandinê yên qeyûman zêde dibin. Nîqaşên ku li Dersimê baweriya elewîtiyê tê çewisandin û li hemberî vê baweriyeke alternatîf tê afirandin tên kirin. Nivîskar Mesût Ozcanê ku der barê elewîtiyê de gelek pirtûk nivîsandine û lêkolîn kirine, rewşa navborî nirxand.
Ozcan, diyar kir ku li Tirkiyeyê nêrîneke suniyan heye ku kesên baweriya wan cuda veguherînin û baweriyên cuda bi nêrîna suniyî tên şêwandin. Ozcan bi lêv kir ku ew vê yekê li Dersimê dibînin û wiha domand: "Li cemxaneya vir tiştên eleqeya wan bi elewîtiyê tune ye tên kirin. Polîtîkayeke li gor çand, ziman û baweriya elewîtiyê nayê meşandin. Li wir bêtir xebatên ku hewl didin elewiyan kontrol bikin tên kirin. Bi vî awayî dixwazin elewiyan bikin sunnî." Ozcan destnîşan kir ku bi taybetî qeyûm bawerî û çanda gel hedef digire û ev tişt gotin: "Qeyûmê Dersimê baweriyeke nû ferz dike. Armanca sereke ya qeyûm elewîtiyê bike sunnî, ya duyemîn jî hewldana afirandina baweriyeke nû. Qeyûm hewl dide baweriya elewîtiyeke ku bîadê bike biafirîne."
Ozcan balê kişand ser cemxaneyên li Tirkiyeyê û ev tişt gotin: "Cemxane, modeleke ku kesên sunî li elewiyan ferzkirin e. Dema îro em li cemxaneyan dinerin qada îbadetê ya elewiyan temsîl nakin. Hewl didin bi temamî baweriya elewîtiyê kontrol bikin. Li cemxaneyan feraseteke rêveberiyê ya kesên nêzî îktîdarê heye. Di baweriya me de navendeke cemê tune ye. Cem li malekê jî tê kirin. Di nêzîkatiya me ya sereke de dema kesekî sûcdar hebe, cihê wan di cemê de tune ye. Lê di cemxaneyên îro de kesên sûcdar, kesên mirov nizane çi ne hene. Karê definkirina cenazeyan jî li gor baweriya elewîtiyê nayê kirin. Bi temamî li gor feraseta sunîtiyê tê kirin. Zimanê îbadeta me kirmnackî û kurmancî ye. Lê dema em îro lê dinihêrin zimanê îbadeta me bi çewisandinên îktîdaran bûye tirkî." Ozcan got qeyûmê tayînî Şaredariya Dersimê hatiye kirin bi çewisandinî bi ser baweriyan de diçe û wiha domand: "Hêza qeyûm tê bikaranîn. Lê kadroyên vê hêzê kî ne? Di salên 19980'yî de waliyê wê demê Kenan Guven bi zorê zarokên me dişandin qursên Qur'an, mixabin ji vana pêk tên. Îro li Dersimê kesên li cemxaneyan wek pîrên cemxaneyan tên nîşandan, kesên di dema Kenan Guven de ji qursên Qur'anê mezûn bûne bi xwe ne."
Ozcan bi lêv kir ku li gor agahiyên ku bi dest wan ketine, qeyûm meaşê pîrê li cemxaneyê dide û qeyûm feraseta Kenan Guven didomîne. Ozcan bang li elewiyan kir ku li hemberî van polîtîkayan bibin yek û wan li vala derxînin.