Wekîlê HDP'ê Lezgîn Botan di 7'ê Hezîrana 2015'an de li navçeya Şaxê ya Wanê di mîtîna partiya xwe de axivîbû. Dozger bi îdiaya "Heqaret li peywirdarê cemaweriyê kiriye" doz vekiribû. Danişîna dozê li Dadgeha Cezayê Asliyeyê ya Şaxê hat dîtin. Dadgehê bi îdiaya "rêxistina sûc ava kirine û ji hêza tirsê sûd girtine û gef xwariye" 2 sal cezayê girtîgehê û bi îdiaya "heqaret li peywirdarê cemaweriyê kiriye" kiriye jî 12 hezar û 775 TL cezayê pereyan li Botan birî.

 

Botan, der barê cezayê hatiye birîn de axivî û got: "Berî mîtîngê qaymeqaymê navçeyê bi keyayan re axivî bû gefên wekî 'Ji hilbijartinê re 20 roj ma li gorî wê hişê xwe bidin serê xwe, tişta pêwîst bikin. Deng nedin HDP'ê bidin AK Partiyê.' Min jî wê demê di mîtînga Şaxê de bang li qaymeqaym kir û got 'Tu peywirdarekî cemaweriyê yî peywira te li gorî qanûnan diyar bûye. Tu jî bi namûsî tev bigere, îstifa bike. Dixwazî bibî wekîl, serokê navçeyê çi dixwazî bibe. Tu nikarî gefan li keyayên ku gel hilbijartiye bixwî. Gelê Şaxê ji kesên wekî te re tiştekî nahêle.' Ji ber van axaftinan doz li min hat vekirin."

 

Botan aşkera kir ku tu aliyê hiqûqî yê vî cezayî tune û ew ê serî li Dadgeha Îstînafê bidin.