Li Dersima ku çewisandin û operasyon gelekî zêde ne, hema bêje bajar bi temamî hatiye qedexekirin. Parlementerê HDP'ê yê Dersimê polîtîkayên çewisîner ên li Dersimê tên meşandin nirxandin û got ku ev polîtîkayên dewletê yên li hemberî Dersimê ne. Onlu got ku 90 sal in li hemberî xweza, nasname û baweriya Dersimê polîtîkayeke êrîşkar heye û ji bo vê mînake herî berbiçav a komkujiya 1937-38'an da. Onlu destnîşan kir ku polîtîkaya li ser Dersimê tê sepandin ne 2 salên dawî ne û kirinên niha wek berdewamiya 90 salên komarê wesifand. Onlu bi lêv kir ku AKP wek faşîzmeke şilfîtazî dekretiye holê û wiha got: "AKP mînaka aşkere ya polîtîkaya faşîzm, înkar, tunekirin û bişavtinê ya 90 salî ye. Hêza wê ya herî berfireh û hêzdar e. AKP polîtîkaya komkujiyan a 90 salî wek mîrateyekê rojane dike." 

 

LI DERSMÊ POLÎTÎKAYA BI DARÊ ZORÊ TÊ MEŞANDIN 

 

Onlu got ku polîtîkaya şerê taybet a dewletê tenê ne ji bo Dersimê ye, bi awayekî giştî li hemberî têkoşîna kurd û Kurdistanê ye û polîtîkayên niha tên sepandin ne yên rojane ne. Onlu bi lêv kir ku paşxaneyeke dîrokî ya van polîtîkayan heye û li gor herêman polîtîkaya dewletê diguhere. Onlu got ku li tevahiya herêmê zext û zorî hene û li Dersimê jî halekî hîn wirdetir ên van zext û zoriyan heye û bi vê yekê dewlet dixwaze civaka elewî ya kurd perçe bike. Onlu destnîşan kir ku lê belê ev du sal in li Dersimê polîtîkaya bi darê zorê tê meşandin. 

 

'ARMANCA WAN KOÇBERÎ YE' 

 

Onlu ev tişt gotin: "Dersimê hat rûxandin û şewitandin. Goristan hatin texrîbkirin. Hemû erdnîgariya wê hatiye qedexekirin. Li herêmên hatin qedexekirin navendên baweriyê hene. A rast bi vê yekê navendên baweriyê yên gel tên qedexekirin. Têkiliya gel a bi xwezayê re, bi bendavan re hat binavkirin. Di 40 salên şer de bi qasî niha li Dersimê daristan neşewitîbûn. Li hemberî xwezaya herêmî jî polîtîkayeke evqasî dijminane heye. Li Dersimê polîtkayaeke dîsa xalîkirina ji mirovan û koçberiyê tê sepandin." Onlu destnîşan kir ku li gor îstatîstîkan herêma herî zêde girtin lê çê dibin Dersim e. Onlu bi lêv kir ku li Dersimê tu mirov nema ye ku doz lê nehatiye vekirin û ev tişt gotin: "Di salên 90'î de polîtîkaya xalîkirina ji mirovan bi şewitandina gundan pêk dihat. Lê niha hem dişewitînin hem koçber dikin hem jî polîtîkaya tepisandin û çewisandinê disepînin. Her çi qas em hejmarên zelal nedin jî, lê li Dersimê polîtîkayeke cidî ya koçberiyê heye. Lê belê wê gelê Dersimê van polîtîkayan li valahiyê derxîne." 

 

'QEYÛM ÇANDÊ QIR DIKE'

 

Onlu balê kişand ser îcraetên qeyûm ên li Dersimê û wiha got: "Şaredariya ku vîna gel e hatiye dagirkirin. Hilbijêr dîl hatin girtin. Bi tayînkirina qeyûman qirkirina çandî didome. Bi destê qeyûm navên ku drama komkujiya 38'an vedibêjin hatin rakirin. Navendên baweriyê bi destê şaredariyê tên bişavtin. Şaredarî tam veguherandine qişlayekê. Gel naxweze biçe. Tu xebateke şaredariyê ya ji bo bawerî, çand û zimanê gel tune ye. Derfetên şaredariyê hemû bi awayekî derhuqûqî beredayî tên xerckirin. Lê belê li gel van pêkanînan hemûyan jî wê gel dîsa vîna xwe li wir bide rûniştandin."