Tevgera Azadî ya Civaka Kurdistanê ya ku ji aliyê Iraqê ve bi fermî wekî partiyeke siyasî hat naskirin, li gorî qanûnan divê di nava 3 mehan de kongreya xwe li dar bixe. Tevgera Azadî ragihand ku ew ê 1'emîn Kongreya xwe ya damezirandinê di 19’ê Çileya 2018’an de li dar bixin.

 

2 HEZAR ENDAMÊN WÊ TEV LI DIBIN

 

Endamê Lijneya Rêveberiyê ya Tevgera Azadî Hisên Kerkûkî ji Rojnewsê re axivî û ev tişt got: “Piştî serlêdana me ya ji bo Saziya Partiyên Siyasî û Rêxistinan a Iraqê ya di 4’ê Kanûna 2017’an de, li gorî qanûna 139’an destûra me ya damezirandinê hat dayîn. Li gorî van qanûnan divê heta 3 mehan em kongreya xwe ya damezirandinê li dar bixin. Me jî biryar da ku em kongreya xwe di 19’ê Çileya 2018’an de li dar bixin.”

 

Dê 2 hezar endam beşdarî kongreyê bibin û heyeteke ji Komîsyona Bilind a Hilbijartinê ya Iraqê jî bi peywira çavdêriyê dê beşdarî kongreyê bibe.

 

Piştî kongreyê tê payîn ku buroyên partiyê werin vekirin.

 

Tevgera Azadî ligel ku li Iraq û Başûrê Kurdistanê bi awayê fermî tê naskirin jî li Herêma Federal a Kurdistanê tê astengkirin.