STENBOL - Platforma Rojnamegerên Jin ên Mezopotamyayê bi boneya 10'ê Çile Roja Rojnamegerên Dixebitin daxuyanî da û got: "Tekane rêya tunekirina tarîtiyê hevgirtin û rojnamegertiya ji bo heqîqetê ye.”
Platforma Rojnamegerên Jin ên Mezopotamyayê bi boneya 10’ê Çileyê Roja Rojnamegerên Dixebitin daxuyaniyeke nivîskî weşandin.
Di daxuyaniyê de ev tişt hatin diyarkirin:
“Em bi binçavkirin, girtin û zextan dikevin 10’ê Çileyê Roja Rojnamegerên ku Dixebitin. 165 rojnameger girtîne û bi kêmahî 10 hezar rojnameger bêkar in, yên ‘li derve’ de jî rastî êrîşan tên. Ji ber vê ji pîrozkirinê zêdetir, pêdiviya me bi geşkirina berxwedana ji bo heqîqetê heye.
RÊYA RAKIRINA TARÎTIYÊ…
Li hemberî medyaya yektîp a ku piştgiriya desthilatdariyê dike, rojnamegerên muxalîf her roj tên girtin û binçavkirin. Nûçeyên me ‘delîl’ tên nîşandan û em tên darizandin. Ligel van êrîşan em dizanin ku tekane rêya derbaskirina vê tarîtiyê rojnamegeriya ji bo heqîqetê ye. Ji kesên ku li Sûrê malên wan hatin xerakirin heta kedkarên ku li Kolana Yukselê dengê wan tê birîn, ji girtiyên di greva birçîbûnê de bigirin heta jinên ku rastî tundiyê tên, em ê bibin dengê gel û tiştên rast binivîsin.
Rojnamegerî ne sûc e û bi heman biryardariyê em ê berê kamera û pênûsa xwe bidin aliyê heqîqetan. 10’ê Çileyê Roja Rojnamegerên Dixebitin ji pîrozkirinê wêdetir, ev roj e ku em têkoşîna xwe nûtir bikin û biryardariya xwe xurtir bikin. Herçiqas desthilatdarî û medyaya wê hevalên me reş bikin jî em ji vir diyar dikin ku em şahidên rojnamegeriya hempîşeyên xwe bin. Li ser vî esasî em balê dikişînin ser rûniştina sibê ya nûçegîhana DÎHA’yê Şerîfe Oruç a ku ji 15’ê Tîrmeha 2016’an û vir ve girtî ye.”