AMED – Peykertiraş Erdal Tut ku ji ber qedexeyên derketina kolanan ên li Sûrê neçar mabû atolyeya xwe bigire, niha xebatên xwe li atolyeya xwe ya nû ya li Yenîşehîrê berdewam dike.
Peykertiraş Erdal Tut, ku piştî ji Beşa Resman a Zanîngeha Yuzuncu Yil a Wanê mezûn bû û dest bi peykeran kir, çêkirina peykeran, nêzîkatiya hikûmetê ya ji bo hunerê û divê mirov çawa nêzî çand û hunerê bibe nirxandin û wiha got: “Ya ku dihêle mirov xweşik li jiyanê binere huner e.”
Erdal Tutê ku 6 sal e peykertiraşiyê dike û cara ewil li atolyeya xwe ya li Sûra Amedê bi rêkûpêk dest bi çêkirina peykeran kir, diyar kir ku wê demek dirêj li Sûrê peykertiraşî kiriye, lê belê piştî qedexeyên derketina kolanan ew neçar maye atolyeya xwe ya bi zor û heft bela vekiribû bigire.
Tut ev tişt gotin: “3 sal in li vir dixebitim. Liv ir peykeran çê dikim, lê ji bo ev berhem bibin neynika gelê me tev digerim, ancax ji ber rewşa siyasî û sosyo-aborî ya welat daxwaza ji bo peykerên min hema bêje pir kêm e.” Tut got ku ji bo ew debara xwe bike tevî peykeran ew amûrên dekoratîfiyê jî çê dike.
‘JI PEYAMA KU BÎRDARIYA ROBOSKIYÊ DIDA TIRSIYAN’
Tut, nêzîkatiya hikûmetê ya ji bo çand û hunerê rexne kir û wiha domand: “Tim hewl didin ku mirovên dixwazin bi awayekî xweşik li jyanê binerin, di pencereyeke cuda de binerin bitepisînin. Peykerê Roboskiyê yê li Peyasê ji ber peyameke bi hezaran di xwe de diheband rûxandin. Her wiha dixwazin Heskîfa ku nirxekî dîrokî yê bi hezaran salî ye birûxînin. Em ê li dijî vê yekê bisekinin.”
‘HUNER ÇEKA HERÎ HÊZDAR E’
Erdal Tut got ku dema mirov bi awayekî xweşik li jiyanê binere, jiyana bi hev re pêkan e û wiha domand: “Pergal bi ola ku aîdê me ye êrîşî me dike, lê wê tu kes nikaribe têkeve navbera me û olê. Ji ber vê dixwazim hemû gel bi baweriyên xwe li jiyanê binerin. Em bi cihana xwe, yanî hunera xwe li jiyanê dinerin. Çimkî huner hêzdar e, huner çeka herî hêzdar e. Bawer nakim ku bêyî hunerê jiyanek pêkan be. Ya ku dihêle mirov xweşik li jiyanê binere huner e.”