Wê çalakiyên di der barê tecrîda li ser Rêberê PKK’ê Abdûllah Ocalan de di sala 2018’an de jî berdewam bin. Wê çalaki tevî Tirkiyeyê, li gelek welatên cîhanê bên lidarxistin. Her wiha , wê li Ewropayê di 7’ê Sibatê de meşek bê lidarxistin û wê meş ji Luxemburgê heta Strasbourgê bidome. Yek ji parêzerên Ocalan Mahmût Şakar çalakiyên ku ji bo Ocalan li Ewropayê tên lidarxistin nirxandin. Şakar bi lêv kir ku çalakiyên ku civaka kurd li Ewropayê li dar dixe, hemû ji bo rakirina tecrîda li ser Ocalan û azadiya wî ne. Şakar dest nîşan kir ku li Ewropayê ji bo Ocalan kevneşopiyeke çalakiyan heye. 

 

Şakar, di vê çarçoveyê de greva birçîbûnê ya di 1’ê Adara 2012’an de dest pê kir û 52 rojan domand bi bîr xist û balê kişand ser Çalakiyên Nobetê yên ji 25’ê Hezîrana 2012’an dest pê kirin û heta niha didomin. Tam li hemberî avahiya Konseya Ewropayê, li cihekî nêzî CPT û DMME’yê, her roj ji aliyê komeke ku hejmara wê herî kêm 5 kes in bi zimanên cuda danezan û broşur tên belavkirin.

 

Şakar, got ku bi vê çalakiya li Strasburgê, tenê ne bi gelê herêmê û siyasetmedaran, ew sîyasetmedar û raêzvanên mafên mirovan ên ji gelek deverên Ewropayê tên jî agahdar dikin.

 

Şakar, bi lêv kir ku Otobêsa Pirtûkxaneya Ocalan jî di 9’ê Cotmeha 2017’an de ji Strasburgê ket rê û li gelek bajarên Swêd, Hollanda, Awistirya, Danîmarka, Swîsre, Fransa û Almanyayê geriyaye û bi vî awayî hewl daye hesasiyetê bide der. 

 

‘OCALAN DI ROJEVA KONSEYA EWROPA Û CPT’YÊ DE YE’ 

 

Şakar, got ku pîvandina hêza van hewldanan ne pêkan e û ev tişt gotin: “Beriya her tiştî civak û derdora siyasî ya Ewropayê tim bi rewş û dîlgirtina Birêz Ocalan re rû bir û maye. Ji 99’an ve tevî hemû hewldanên dewletan jî kurdan Birêz Ocalan tim di rojeva xwe de zînde kiriye û tim bi awayekî rêkûpêk agahiyên rojane bi raya giştî re parve dike. Her wiha siyaseta Ewropayê, kêm be jî di vî warî de hin daxuyanî dane û ya herî girîng jî ew e ku, herî zêde çalakî li strasburgê hatine lidarxistin. Ev der navenda Konseya Ewropa, CPT û DMME’yê ye. Jixwe çalakî jî li qada ku her sê sazî lê ne tên lidarxistin. Yekane saziya cidî ya ku Tirkiye endamê wê ye Konseya Ewropayê ye. Ger Birêz Ocalan tim di rojeva Konseya Ewropa û CPT’yê de mabe, wisa difikirim ku bandora van çalakiyan zêde li ser vê rewşê heye.”

 

‘HESASIYET ZÊDE BÛ’ 

 

Çend meh berê li ser medyaya civakî di hin parvekirinan de hatibû derpêşkirin ku Ocalan jiyana xwe ji dest daye. Şakar, ev parvekirin jî nirxandin û destnîşan kir ku ev rewş hesasiyeta kurdên li Ewropayê zêdetir kiriye û piştî bûyer li ser medyaya civakî belav bûye, li gelek bajarên cuda mirov jixweber daketine kuçeyan û çalakî lidarxistine. Şakar ev tişt gotin: “Pişt re li Strasburgê çalakiya rûniştinê hat lidarxistin û di vê çalakiyê de griseyeke mezin derket holê. Her wiha di dema vê çalakiyê de bi rayedarên CPT û Konseya Ewropayê re hevdîtin hatin çêkirin.” Şakar destnîşan kir ku ew wisa difikire ku wê ev çalakî di sala nû de jî berdewam bin. 

 

Şakar, bi lêv kir ku demeke dirêj e wan der barê tecrîda li ser Ocalan de bi CPT’yê re pêwendiyê daniye û bi awayekî rêkûpêk agahî tên ragihandin, rapor tên berpêşkirin û hevdîtin tên çêkirin.  Şakar diyar kir ku der barê tecrîdê de herî dawî civaka kurd, nûnerên saziyên li Ewropayê, saziyên sivîl û siyasî yên Tirkiyeyê, hin komên navnetewî bi CPT’yê re hevdîtin çê kirin. Şakar ev tişt gotin: “Dikarim bêjim ku herî zêde di vî du mehên dawî de bi CPT’yê re hevdîtin hatine çêkirin. Her wiha di dema çalakiyê de gel her roj di demên diyarkirî de heta CPT’yê meşiyaya û li ber avahiyê mîtîngên demkurt li dar xistine. Di vî warî de gel zaf hesas e û bertekên xwe nîşanî CPT’yê dide. Heta carekê  hindik mabû welatiyekî ji Rojavayê li ber CPT’yê xwe bişewitîne, lê welatiyan nehişt.” 

 

 ‘CPT Û DMME XWE LI NEBIHÎSTINÊ DATÎNIN’ 

 

Şakar wiha domand: “Helwesta heyî ya CPT’yê, ji ya berê pir cuda ye û êdî veguheriye rewşeke ku mirov şaş dimîne. Wek DMME’yê, di serdemeke ku herî zêde peyman tê binpêkirin de xwe li nebihîstinê datîne. Ya girîng jî ew e ku tu dibê qey ev sazî bi van tewrên xwe dixwazin xwe derî vî tiştî bihêlin.” Şakar diyar kir ku helwesta CPT û ya DMME’yê ya der barê îşkence û tecrîda li ser Ocalan de, wek pasdayîna bi huqûqa hundurîn a tirk re dikare bê ravekirin û wekî din tu îzahiyateke vê tune ye.

 

‘BIRÊZ CPT HEKE TU SAX BÎ DENG BIDE’ 

 

Şakar, destnîşan kir ku divê hîn bêtir bi CPT û DMME’yê re pêwendî bê danîn û di vî warî de çalakiyên demokratîk bên lidarxistin. Şakar wiha domand: “Yanî divê em zanibin ka sax in an mirî ne. Heke sax bin, ne zehmet be wê deng bidin! Heta pozîsyona xwe ya rasteqîne ji gelê me re nebêjin, divê em dev ji van saziyan bernedin. Divê em tewrekî ku di şexsê Konseya Ewropa, CPT û DMME’yê de bi awayekî cidî demokrasiya Ewropayê lêpirsîn dike nîşan bidin. Ev yek jî ne bi gotinên xemilandî, em ê di rol û risteke pratîkî de fêm bikin.” 

 

Şakar, bi lêv kir ku divê ew bêdengî û durûtiya Ewropayê ya li hemberî faşîzma li Tirkiyeyê bê redkirin û di vî warî de heta bi awayekî cidî Eropa neye rexnekirin, tu qîmeta rexnekirina Tirkiyeyê tune ye. 

 

WÊ ÇALAKÎ BERDEWAM BIN 

 

Li gor agahiyên ku Şakar dan wê di 7’ê Sibatê de ji Luxemburgê heta Strasburgê meşek bê lidarxistin. Wê meş di 17’ê Sibatê de li Strasburgê bid awî bibe û wê div ê rojê de ji bo protestokirina komploya navnetewî meş û mîtîngeke mezin bê lidarxistin. Piştî vê meş û mîtîngê wê li bajarên gelek welatan çalakî berdewam bin.