Endama Kongreya Jinên Azad (KJA) Berjîn Demîrkaya di dema qedexeya derketina derve de li navçeya Cizîrê ya Şirnexê bi komek mirov re dema xwe di jêrzemîna avahiyekê de dihewandin, hêzên dewletê ew kuştin. Serdozgerê Komarê yê Şirnexê di sala 2017'an de bi îdiaya "Endamên PKK'ê ne" der barê wan de lêpirsîn da destpêkirin û der barê kuştina Demîrkaya de biryara "Pêwîstî bi lêpirsînê tune" da. Lê tişta ecêb ew e ku, di dosyaya lêpirsînê de dozger Demîrkaya wekî "gumanbara kuştî" nîşan da.

 

Têgeha "kesên gumanbar ên kuştî", di hiqûqê de bi giştî wekî "Fikara bi giştî li dijî bûyerên şênber a di nava jiyanê de pêk tê" tê bi kar anîn, lê di lêpirsîna ku der barê Demîrkaya hat destpêkirin de, heta niha tişta ku qet nehatiye dîtin, Demîrkaya wekî "gumanbara kuştî" hat nîşan dan. 

 

Lê belê der barê awayê mirana Demîrkayayê de tu tişt nehatin gotin. 

 

Dozgerê ku îdia dike ku Demîrkaya "Endama PKK'ê ye", bi rêya malperên înternetê delîlan berhev dike û van îdiayan bi îfadeyên şahidên nepen destek dike. Lê ev şahidên nepen ên ku îfadeyên wan hatine girtin, her yek ji wan der barê Demîrkaya de îfadeyên cuda didin û tiştên balkêş derketin holê.

 

JI BO 'TERORÎST' NÎŞAN BIDIN ARŞÎV LÊKOLÎN KIRIN

 

Dozger ji bo Demîrkaya wekî "Endama PKK'ê" nîşan bide, destpêkê serî li GBT'ê da û 5 lêpirsînin û dozên lêpirsînê yên heta niha der barê wê de hatine vekirin, li pey hev di ewraqê de rêz kirin. Lê ev lêpirsînên der barê Demîrkaya de hemû piştre ketinê, lê belê dozên der barê wê de bi beraetê bi encam bûne, di ewraqa lêpirsînê de cih negirtin. 

 

Serdozgerê Komarê yê Erziromê berê der barê bav û keça wî de doz vekiribû û îdia kiribû ku Berjîn Demîrkaya "Endama YPG'ê" ye.

 

RAPORA NEXWEŞXANEYÊ DEREWAND

 

Agahiyên di ewraqa lêpirsînê ya dozger cih digir de tê gotin ku "Ji bo tev li rêxistinê bibe, ji Erziromê tê Cizîrê", lê piştre derket holê ku Demîrkaya di navbera 2013 û 2015'an de ji bo tedawiyê bibîne, çûye Nexweşxaneya Lêkolînê ya Zanîngeha Erziromê. Raporên nexweşxaneyê nîşan didin ku heta qedexeya li Cizîrê berdewam dike jî, Demîrkaya bi rêk û pêk çûye nexweşxaneyê û derman bûye.

 

OZBEK: KESÊN KUŞTÎ NABIN KESÊN BI GUMAN

 

Parêzera malbata Demîrkaya Gulşen Ozbek ji MA'yê re axivî, aşkera kir ku lêpirsîna ku hatiye vekirin, bi her awayî sosret e.

 

Ozbek destnîşan kir ku lêpirsîna ku der barê Demîrkaya de hatiye destpêkirin, sedema mirina wê, çawa hatiye kuştin û der barê dîtina kiryaran de tu lêpirsîn nehatine destpêkirin û wiha axivî: "Biryara dozger a hewcehiyê bi peyketinê nabîne de, Berjîn wekî 'gumanbara kuştî' pênase dike û ev bi tu awayî di huqûqê de cih nagire. Kesên kuştî nabin kesê bi guman. Kesên jiyana xwe ji dest didin, der barê wan de lêpirsîn nayê destpêkirin. Ev rêgezeke bingehîn a hiqûqê ye." 

 

Ozbek, da zanîn ku wekî sûc der barê kiryaran de tu pênase nehatiye kirin û wiha domand: "Wekî ku Berjîn endama rêxistinê be lêpirsîn hatiye destpêkirin. Lê dema lêpirsîn der barê kuştina bi zanebûnî de bê destpêkirin, divê 'kesên bi zanebûn kuştine' wekî sûcdar bên dîtin. Kuştinên di salên 90'î de pêk dihatin, qet nebe wekî 'kiryar nediyar' dihat pênasekirin. Ev lêpirsîn ji vê yekê jî paşvetir maye. Dema şiklê kuştin û mirinê bê diyarkirin, divê kiryar bê lêkolînkirin. Ji bo kiryar bê tespîtkirin lêpirsîn nehatiye meşandin. Di vê warî de tu tespîtek nehatiye kirin. Lêpirsîneke bê kiryar hatiye meşandin."

 

MA / Ruştu Demîrkaya