AMED - Serbijîşkiya Nexweşxwaneya Zanîngeha Dîcleyê, der barê Ç.K. ya vîrûsa HIV'ê di wê de tespît bû de daxuyanî da û aşkera kir ku der barê bijîşkan ku emeliyat red kirine, lêpirsîn hatiye destpêkirin.
Serbijîşkiya Fakulteya Tipê yê Zanîngeha Dîcleyê, bal kişand ser jina bi navê Ç.K. a ji bo welidandinê çû nexweşxaneyê û vîrûsa HIV'ê di wê de tespît bû û hat gotin ku hin bijîşk neketine emelyata wê, ji ber wê civîna çapemeniyê li darxist. Serbijîşk Prof. Dr. Alî Kemal Kadîroglu di civînê de axivî, da zanîn ku bijîşkên Ç.K. emeliyat nekirine, der barê wan de lêpirsîn hatiye destpêkirin.
Kadîroglu destnîşan kir ku piştî nexweş 5,5 saetan di beşa lezgîn de hatiye rawestandin, berpirsyarê beşê ji mala xwe hatiye û Ç.K. emeliyat kiriye û wiha axivî: "Ji ber ku di emeliyatê de tevdîrên parastinê nehatine girtin, bijîşka astîstanî derzî di destê wê re çûye û ev bijîşka astîstan ji bo bêhna xwe bistîne şandine malê." Kadîroglu diyar kir ku li nexweşxaneyê ekîbên tenduristiyê têra xwe hene, şeva bûyerê hin bijîşkan bi hincetên wekî "Lepikên bariyerî" tunene, nexwestine bikevin emeliyatê, li ser vê li Nexweşxaneya Welidandinê ya Jinan "Lepikên bariyerî" hatine temînkirin.
Kadîroglu anî ziman ku ji ber lepikên bariyerî tunebûne, endamê hîndekarê nobedar nexwestiye bikevin emeliyatê, piştî agahî dane serokê beşa zanyariya bingehîn, Prof. Dr. Mustafa Kemal Çelen ketiye emeliyatê.
Kadîroglu diyar kir ku peywirdarên ku emeliyat red kirine, der barê wan de lêpirsîn hatiye destpêkirin û agahî ji Rektoriya Zanîngeha Dîcleyê re şandine.