Îktîdara AKP'ê di her firsendê de berî her tiştî berê xwe dide girtîgehan. Bi OHAL'ê û derxistina KHK'yan re mafê girtiyan ê ragihandinê qut kir. Bi KHK'yên dawî jî biryara "Cilên Yek Tîp" derxist û dixwaze cilên yek tîp li girtiyan bike. Di serdema 12'ê Îlonê de jî girtiyan "cilên yek tîp" qebûl nekiribûn û avêtibûn. Girtiyên Girtîgeha Amed, Metrîs, Sultanahmet û Sagmacilarê li dijî vê pêkanînê li ber xwe dan û cil li xwe nekiribûn. Şahidê wê demê diyar kirin ku girtî li rûmeta xwe xwedî derneketin û tevî hemû zextan li ber xwe dan. Şahid û mexdûrê darbeya 12'ê Îlonê Tuna Atalay ê li Girtîgeha Metrisê ji ber ku li dijî cilên yek tîp derket 2 sal û nîvan di yek hucreyê de hat girtin û anî ziman ku ew wêneyê dema ew û hevalên wî tazî anîn salona dadgehê wêneyê rûmeta wan e. Atalay, da zanîn ku ew wêneyê berxwedanê rûmeta wan e û wiha got: "Me wê demê tu carî ji rûmeta xwe tawîz neda, em niha jî ji rûmeta xwe tawîzê nadin. Em dê bi wî wêneyê berxwedan û rûmetê hebûna xwe berdewam bikin."  

 

Atalay, anî ziman ku di salên 1983-1985'an de li Girtîgeha Metrîsê li dijî cilên yek tîp li ber xwedan û wiha got: "Pêkanenên wê demê îro dîsa bi KHK yan dixin meriyetê. Di serdema 12'ê îlonê de xwestin her kesî bikin wekî leşkeran. Xwestin her kesî bikin yek tîp. Xwestin her kesî ji nasnameyên wan ên siyasî dûr bixin û mejiyê wan ji bikin yek tîp. Piştî pergala yek tîp dest pê kir, qedexe, ceza û astengiyên li ser mafê me gelek zêde bûn. Em di çileyên 1984'an de rastî vê pêkanînê hatin. Di meha cileyê de danişîna doza me hebû. Leşkeran bi zorê cilên yek tîp li me kirin. Pişte ez û hevalên min kelepçe kirin û avêtin hewşê. Dema em birin salona dadgehê kelepçeyên me ji destê me derxistin. Me li salonê cilên yek tîp çirandin û avêtin. Me wê demê siloganên ku em cilên yek tîp li xwe nakin berz kirin. Piştî vê pêvajoyê û çalakiyên greva birçîbûnê dest ji vê pêkanîna cilên yek tîp berdan. Me cil li xwe nekir. Hemû pevajoya girtî me bi bincilan derbas kir. Ji ber em li dijî cilan derketin hemû mafê me li me qedexe kir. Hewş, ziyaret, ragihandin her tişt li me qedexe kir. Piştî me jî yên hatin girtin ew berxwedan berdewam kir. Em hemû kesên wê demê dihatin darizandin tev hatin berdan û beraet kir."  

 

‘NASNAMEYA SÎYASÎ HEYE' 

 

Atalay, anî ziman ku wê demê cilên yek tîp li girtiyên edlî ferz nekirin û tenê li girtiyên siyasî ferz kirin û wiha got: "Ji ber ku girtiyên siyasî xwedî nasnameyek bû xwestin wan bê nasname bihelin û ev li ser girtiyên siyasî pêş xistin. Xwestin polîtîkaya yek tîp li ser mirovan pêş bixin. Wê demê piştî berxwedanê û bi bedelên mirin birîndar û berxwedana li dijî zilmê ev pergal bi dawî bû." 

 

‘MÎNAKA GUANTANAMO LI DIJÎ MIROVAHIYÊ YE'

 

Atalay, bal kişand ser gotinên Serokê AKP'ê Erdogan a ku Guantanamo wekî referand û mînak nîşan da û wiha got: "Mînaka Guanatamo nişan dide ku li dijî hniqûqê ye. Ji ber ku ev girtîgeh li dijî nirxên mirovahiyê ye. Nîşana dijmirovahiyê ye. " 

 

‘LI DIJÎ YEK TÎPÊ YEKÎTÎ'

 

Atalay, anî ziman ku pir girîng e ku her kes li dijî vê biryara "Cilên yek tîp" bibin yek û wiha got: "Yekîtiya li dijî vê biryarê pir girîng e. Bê guman girtiyên siyasî dê cilên yek tîp li xwe nekin. Lê divê li derve jî li dijî vê biryarê yekîtî û bertekên xurt hebin. Divê li derve û hundir hemû kes li dijî vê pergalê bibin yek. Ji ber ku ev binpêkirina karneya mahsumiyetê ye. Binpêkirina mafan e. Li dijî hiqûqa navneteweyî û neteweyî ye. Li dijî edalet û mafên mirovan e."

 

Atalay, bal kişand ser wêneyê ku li salona dadgehê hatiye kişandin û wiha got: "Ew wêneyê rûmetê ye. Ew bû sembola berxewdana Metrîsê. Ew wêne di 17'ê Çileya 1984'an de hat kişandin. Piştî cilên yek tîp ket meriyetê yekem rûniştina dozê ya me bû. Ew wêne bû wêneyê rûmetê û em dê vî wêneyî û vê rûmetê biparêzin û diparêzin. 

 

Atalay, herî dawî anî ziman ku hikûmetê piştî 15'ê tîrmehê OHAL û KHK xistin meriyetê û ev pêkanînên wê nîşan dide ku hikûmeta AKP’'ê dixwaze xwe bişîbine 12'ê îlonê û nişan dide ku berdewama 12'ê Îlonê ye." 

 

MA / Yasin Kobulan - Sadiye Eser