Qeyûmê tayînî Şaredariya Cizîrê hat kirin, Mala Dengbêjan a Botanê ku di 22’yê Sibata 2015’an de ji aliyê şaredariya DBP’î ve hatibû çêkirin, hinekî guherand. 

 

RADESTÎ PERSONELÊN BI KURDÎ NIZANIN HAT KIRIN 

 

Li vê mala dîrokî ku demekê cihê dîwana dengbêjên Botanê  bû, carinan ji bo organîzasyona nîşan, dawet  û mewlûdên kesên nêzî AKP’ê tê bikaranîn. Ji ber nebûna dîwanên dengbêjan welatî êdî naçin vê malê û her wiha li şûna xebatkarên wê personelên ji Dîlokê anîn hatine bicihkirin. Personelên ku der barê dengbêjiyê de hay ji tu tiştî tune ne, bi kurdî jî nizanin. 

 

Wêneyên berê li ser deriyê Mala Dengbêjan jî hat guherandin. Li şûna tabeleya ku wêneyên M. Arifê Cizrawî, Hesen Cizîrî, Eyşe Şan, Seîd Axayê Cizirî û hunermendên din lê hebû, tabeleya alaya tirk  li ser û li ser “Mehmet Ağa Kasrı Dengbejler Evi ve Melaye Cizîrî Kütüphanesi” nivîsandî hat daliqandin.

 

‘VAN ERMENAN JI VIR RAKIN’ 

 

Her wiha qeyûm Farûk Aricanê ku tayînî şaredariyê hat kirin jî fermana “Wêneyên dengbêjên ne ji Cizîrê ne rakin” daye û li ser vê fermanê wêneyên dengbêj û hunermendên bi eslê xwe ermen Karapêtê Xaço û Aram Tîgran û dengbêj Şakiro û hunermend Eyşe Şanê ku li dîwanê daliqandî bûn hatin rakirin. Karkerê ku berê li şaredariyê dixebitî û nexwest navê xwe bibêje anî ziman ku qeyûmê berê Ahmet Adanûr ji bo vê rewşê fermana “Van ermeniyan ji vir rabikin” daye. Karker got ku piştî tayîna Adanûr derketiye, ev fermana wî ragihandine qeyûmê nû û wêne hatine rakirin.

 

DIBÊJIN QEY EHMEDÊ XANÎ Û ÎSA BERWARÎ CIZÎRÎ NE! 

 

Niha li dîwana Mala Dengbêjan wêneyên Mehemed Arifê Cizrawî, Hesen Cizîrî, Meryem Xan û Seîd Axayê Cizîrî û li gel vê wêneyên Ehmedê Xanî û Îsa Berwariyê ji Kurdistana Federe ye daliqandî ne. Hat gotin ku qeyûm dibêje qey Ehmedê Xanî û Îsa berwarî ji Cizîrê ne û ji ber vê wêneyên wan nehatine rakirin.