ŞIRNEX – Parlementerê HDP’ê yê Şirnexê Ferhat Encu yê di Komkujiya Roboskiyê de birayekî xwe û 9 xizmên xwe winda kir, têkildarî salvegera komkujiyê nameyek ji girtîgehê şand û wiha got: “Ya ku dikeve ser milê me ew e ku em li hemberî zaliman û xerabiyê serî netewînin û hêvî û berxwedan mezin bikin.”
Parlementerê HDP’ê yê Şirnexê Ferhat Encu yê di Girtîgeha Tîpa F a Kandirayê de ye, der barê Komkujiya Roboskiyê ya di 28’ê Kanûna 2011’an de li gundê Robsokî yê Qilebana Şirnexê ji aliyê balafirên şerî ve pêk hat û 34 sivîl mirin nameyek şand. Encuyê ku di komkujiyê de birayekî xwe û 9 xizmên xwe winda kir nameya xwe bi riya parêzeran şand û anî ziman ku ew her roj heman komkujî pêk tên.
‘BERPIRSIYAR LI SER KAR IN’
Encu ku got “Wek her komkujiyê di ya Roboskiyê de jî kiryar hatin pakkirin û terîfkirin” anî ziman ku komkujî di dehlîzên tarî yên Enqereyê de hatiye windakirin. Encu destnîşan kir ku ji bo wan tu hêleke Roboskiyê ya ku tarî mabe nemaye û berprisiyarên siyasî û leşkerî diyar in û hîn jî li ser kar in. Encu destnîşan kir ku ew li bendê ne ku berpirsiyar bên darizandin û wiha got: “6 sal in bi pêşengiya malbatên Roboskiyê gelê me û parêzvanên mafên mirovan têdikoşin. Heta niha der barê van kesên ku ji bo edalet û wijdanê têdikoşin de gelek lêpirsîn hatine vekirin. Gelek kes hatin girtin û cezayê pereyî li wan hatiye birîn. Tevî hemû çewisandin û derhuqûqiyan jî kesên berpirsiyarên komkujiya Roboskiyê nadarizînin di 4’ê Mijdarê de li hemberî vîna gel darbeyek pêk anîn û min girtin.”
‘DARAZ Û ÎKÎTDAR BI HEV RE TEV DIGERIN’
Encu diyar kir ku bi girtina wî re îktîdarê careke din nêrîna xwe ya ji bo Roboskiyê nîşan daye û ev tişt gotin: “Dema mesele canê kurd û muxalifan be îktîdar û daraz bi heman ferasetê tev digerin. Di dîrokê de gelek mînakên vê yekê hene. Ûgûr Kaymaz, Ceylan Onkol, Alî Îsmaîl Korkmaz, Berkîn Elvan, Hrant Dînk, Tahir Elçî… Çimkî di feraseta dewletê de jîndarkirian mirov tune ye. Jîndarkirina dewletê heye. Ev feraseteke seqet e.”
‘EM HÊVIYÊ MEZIN BIKIN’
Encu destnîşan kir ku li hemberî vana ya ku dikeve ser milê wan ew e ku li hemberî derhuqûqîtî û zorbetiyê derkevin û bi van gotinan dawî li nameya xwe anî: “Ya ku dikeve ser milê me ew e ku em li hemberî zaliman û xerabiyê serî netewînin. Hêvî û berxwedanê mezin bikin. Çimkî berxwedan wijdan e, ehlaq e. Mafekî demokratîk e. Bi vê baweriyê careke din ez di şexsê Komkujiya Roboskiyê de hemû kesên di komkujiyan de mirine bi hezkirin û bêrîkirinê yad dikim. Kesên ev komkujî pêk anîne jî şermezar dikim.”