AMED - Dayika Endamê PKK'ê Veysi Aktaş ê bi peywira sekreteryaya Rêberê PKK'ê Abdullah Ocalan sewqî Îmraliyê hat kirin 33 meh in agahî ji kurê xwe nagire. Dayika Veysi Aktaş Faika Aktaş, diyar kir ku nêzî 3 sal in agahiyê ji kurê xwe nastîne û nizanin kurê wan dijî an najî. Aktaş, xwest hemû derî bên vekirin û Ocalan azad bibe û wiha got: "Tenê Ocalan dikare aştiyê bîne."
Rêberê PKK'ê Abdullah Ocalan ku di 15'ê Sibata 1999'an de bi destê hêzên navneteweyî radestî Tirkiye hat kirin û şandin Girtîgeha Tîpa F a Ewlehiya Bilind a Îmraliyê, ji wê demê heta niha di yek huceryê de tê girtin. Rêberê PKK'ê Abdullah Ocalan nêzî 19 sal in di bin tecrîdê de tê girtin û ji 11'ê Îlona 2016'an heta niha bi tu awayî agahî jê nayên girtin. 3 girtiyên PKK'î yên sewqî girtîgeha Îmraliyê ku Ocalan jî lê girtî ye, ji Adara 2015'an heta niha agahî jê nayê girtin. Malbata 3 girtiyên PKK’î 33 meh in agahiyê ji zarokên xwe nastînin û bi fikar in. Parêzerên Rêberê PKK'ê Ocalan, ji 27'ê Tîrmeha 2011'an heta niha 716 carin ji bo biçin hevdîtinê çê bikin serî li serdozgeriya Komarê ya Bûrsayê dan. Lê her carê bi hincetên cuda daxwaza malbatê red dikin. Malbata Ocalan jî ji 11'ê Îlona 2016'an heta niha agahiyê ji Ocalan nastînin. Her wiha 3 girtiyên PKK’î yên li Îmraliyê jî 33 meh in agahî ji wan nayê girtin. Girtiyên PKK'î yê li Îmraliyê Veysi Aktaş, Omer Hayri Konar û Hamili Yildirim, di çarçoveya pevajoya çareseriyê de bi peywira sekreteryaya Rêberê PKK'ê Abdullah Ocalan bikin sewqi Îmraliyê hatin kirin. Girtî di Adara 2015’an de sewqî Îmraliyê hatibûn kirin û 33 meh in malbatên wan agahî ji wan nastînin. Malbata girtiyê PKK'ê Veysî Aktaş têkîldarî tecrîda li ser girtiyan fikarên xwe anî ziman.
PIŞTÎ OHAL'Ê HEMÛ ZIYARET HATIN QEDEXEKIRIN
Piştî OHAL hat îlankirin bi her awayî têkiliya girtiyên li Îmraliyê ji derve hatin qedexekirin. Telefon, name û faks tev hatin qedexekirin û malbat bi tu awayî agahiyê ji zarokên xwe yên li Îmraliyê nagirin. Heri dawî li ser daxwaza Dozgerê Komarê yê Bûrsayê bi biryara Dadweriya Înfazê ya 1'emîn a Bûrsayê di Tîrmeha 2016’an de bi hinceta OHAL'ê der barê 3 girtiyên li Îmraliyê cem Ocalan hemû ziyaret û ragihandin li wan qedexe kir. Qedexeya ziyaret û ragihandina ku di Adara 2015’an de dest pê kir, piştî OHAL'ê bi awayekî fermî xistin meriyetê û serlêdanên malbatan tev hatin redkirin. Yek ji girtiyên PKK’ê Veysi Aktaş ê 48 salî ye. Aktaş, ji ber pêkanînên li Îmraliyê di bin tecrîda giran de ye û 33 meh in nikare bi malbata xwe re têkiliyê deyne. Aktaş ku ji Girtîgeha Tîpa F a Kirikkaleyê sewqî Îmraliyê hat kirin û pişt re ew xistin bin tecrîdê, malbata wî der barê tenduristî û jiyana wî de bi fikar e. Dayika Veysî Aktaş Faika Aktaş, diyar kir ku piştî kurê wê sewqî Îmraliyê hatiye kirin careke din agahî ji kurê xwe negirtiye.
‘PIŞTÎ KURÊ MIN ÇÛ ÎMRALIYÊ MIN TENÊ NAMEYEK Û FAKSEK JÊ GIRT
Faîka Aktaş, anî ziman ku kurê wê Veysî di sala 1993'an de li Stenbolê hatiye girtin û cezayê muebbeta giran lê hatiye birîn û wiha got: "Belaheq û belasebeb ceza li kurê min birîn û 24 sal in bi awayekî neheq girtiye. Beriya kurê min sewqî Îmraliyê bikin li Girtîgeha Tîpa F a Kirikkaleyê bû. Heri dawî min kurê xwe li Kirikkaleyê dît. Kurê min di Adara 2015'an de sewqî Îmraliyê kirin. Piştî sewqî Îmraliyê kirin êdî nikaribûm biçim ziyareta wî. Destûr nedan ku em malbat biçin Îmraliyê zarokên xwe ziyaret bikin. Piştî kurê min şandin Îmraliyê min tenê name û 2 faks jê girtin. Carekê jî nehiştin telefon bike ku ez dengê wî bibihîzim. Ger ku telefon bikiraya min ê zanibûya ku dijî an na. Lê niha kurê min diji an najî em nizanin û em di nava fikaran de ne."
‘AŞTÎ TENÊ DIKARE BI OCALAN BÊ'
Dayika Veysî Aktaş Faîka Aktaş, anî ziman ku 33 meh in nikare agahiyê ji kurê xwe û girtiyên din bistîne û ew nizanin zarokên wan li wir dijîn an na. Aktaş, da zanîn ku ew ji tenduristî û ewlehiya zarokên xwe bi fikar in û wiha got: "Zêdeyî 2 sal in min kurê xwe nedîtiye. Ez nikarim bêyî kurê xwe bisekinim. Niha çi dike sax e an miriye nizanim. Ger ku ez dengê kurê xwe bibihîzim dê dilê min rihet bibe. Ez dixwazim kurê xwe bibînim û çavê xwe li vê dinyayê bigirim. Ev zilm û zordarî ye. Em dixwazin zarokên xwe û Serokê xwe Ocalan bibînin. Ger ku bixwazin dikarin destûrê bidin û em biçin Îmraliyê. Ma ne guneh e. Bi vê zilm u dijmantiyê çi dikeve destê wan. Heta niha zilm ji tu kesî re nemaye. Ji wan re ji namîne. Em dixwazin dest ji vê zilmê berde. Em dixwazin hemû girtiyan berdin û Ocalan azad bikin. Em dibêjin ger ku aştiyek pêk bê tenê bi azadiya Ocalan pêkan e. Tenê Aştî dê bi Ocalan bê. Ji bo vê yekê jî em dixwazin demek berî demekê tecrîd bê rakirin."
MA / Denîz Tekîn